Debati për kufirin detar mes Shqipërisë dhe Greqisë ka vijuar i nxehtë edhe dje. Mediat greke kanë shkruar me dhjetra artikuj, ndërsa nuk kanë munguar dhe reagimet në politikën shqiptare. Deklarata e kryeministrit grek për zgjerim me 12 milje ka ngjallur mjaft spekulime dhe secili e interpreton sipas dëshirës. Normalisht edhe mediat në Greqi e kanë interpretuar këtë qëndrim dhe shumë prej tyre janë në një linjë sa i takon vështirësive që Shqipëria dhe Greqia të gjejnë gjuhën e përbashkët. Shumë media janë shprehur se gjasat që të kemi një pakt ta afërt janë minimale. Gazeta “Proinoslogos”, “Kathimerini”, “Protothema” dhe shumë portale të tjera kanë shkruar shumë artikuj dje dhe bie në sy fakti se grekët i kanë sytë te zgjedhjet e 2021 me shpresën se Basha e Berisha do vijnë në pushtet për të ripërsëritur 2009. “Proinoslogos” shkruan se problemi më i madh që nuk do e lejojë një pakt është Turqia. Sipas saj, Rama është mik me Erdogan dhe presidenti turk nuk do të lejojë kurrë që qeveria socialiste të arrijë paktin me Athinën. Sipas tyre, ka pakt Rama-Erdogan kundër një marrëveshje. “Greqia po hyn në bisedime me Shqipërinë duke pasur në “portofolin” e saj marrëveshjet me Egjiptin dhe Italinë, sigurisht në përputhje me të Drejtën Ndërkombëtare. Por nuk ka aspak siguri se qeveria “Rama” do të shkojë drejt një pakti, pasi në fund të fundit ishte ai që rrëzoi marrëveshjen mes qeverisë së Karamanlis dhe asaj të Berishës. Nga ana tjetër edhe pse kryeministri shqiptar ka ambicien për të integruar vendin e tij në BE, marrëdhëniet e tij me Erdogan nuk lënë shumë hapësirë për një marrëveshje të menjëhershme. Mbi të gjitha turqit tregojnë me cinizëm se ishin ata që e shtynë Ramën të kundërshtojë paktin Karamanlis-Berisha, sepse mund të përbënte precedent për Egjeun”, thuhet më artikull. Më pas tregohet se grekët i kanë sytë te zgjedhjet e reja, pasi mesa shkruajnë mediat, me Bashën dhe Berishën do të jetë më e lehtë arritja e një pakti. “Fakti që Shqipëria ka hyrë në periudhën parazgjedhore komplikon situatën e Ramës, i cili akuzohet nga opozita si pro turk, ndërsa nga ana tjetër një marrëveshje me Greqinë do ta vërë atë përballë vetes”, thuhet më tej.
Sytë edhe te Meta
Një tjetër personazh ku i kanë sytë grekët është dhe presidenti Meta. Ai ka bllokuar deri më tani marrëveshjen dhe vetë ministri i Jashtëm e tha pak ditë më parë se Presidenti shqiptar nuk po jep autorizimin për rifillimin e bisedimeve. Sipas medieve greke, klima e tensionuar në marrëdhëniet Rama-Meta do e vështirësojë akoma dhe më shumë situatën. Pra nëse lexohet me kujdes, duket se shpresat e grekëve janë te Meta, Basha e Berisha. Meta është ndër të paktët që është dekoruar nga grekët dhe ishte po ai që i dha Janullatosit shtetësinë shqiptare. Megjithatë mbetet të shihet se si do të shkojë rrjedha e ngjarjeve pasi Ballkani duket se është kthyer në fuçi baruti. Tensionet në Mesdheun Lindor janë shtuar ndjeshëm mes Greqisë e Turqisë, ndërsa nuk përjashtohet që dhe mes Tiranës e Athinës të rinisin përplasjet.
Ndarja e kufirit
Nga ana tjetër gazeta greke “Kathimerini” në një analizë të saj mbi deklaratat e kryeministrit
Mitsotakis ka hedhur detaje se si do të bëhet ndarja e territorit. Konventa u jep të drejtë të dyja shteteve që të zgjerojnë me 12 milje territorin. Por problemi është te pikat ku distanca është nën 24 milje, ku dhe u abuzua nga qeveria Berisha. Sipas gazetës në këtë rast zbatohet parimi i vijës së mesme, pra mesatarja e distancës midis brigjeve greke dhe të vendit fqinj. Sipas të përditshmes greke ky është rasti me Shqipërinë, e cila prej bllokimit të Gjykatës Kushtetuese nuk ka proceduar me asnjë demarkacion me Greqinë që nga viti 2009. Por sipas mediave greke vendimi i Kiriakos Micotakis nuk cenon ujërat territoriale shqiptare, por është thjesht një lëvizje simbolike dhe tërësisht politike. Pra duket se e gjitha ka të bëjë me presionet e Turqisë./ sot.com.al
