Të paktën tetë persona kanë vdekur në Santa Catarina, në jug të Brazilit, pasi një balonë me ajër të nxehtë u përfshi nga flakët gjatë fluturimit, humbi kontrollin dhe u rrëzua në tokë. Shkaku i aksidentit është ende i paqartë, ndërsa autoritetet po hetojnë incidentin.
Guvernatori rajonal Jorginho Mello shkroi në X: “Jemi të gjithë të tronditur nga aksidenti që përfshiu një balonë me ajër të nxehtë në Praia Grande këtë mëngjes. Ekipi ynë i shpëtimit është në vendngjarje… Deri më tani, kemi konfirmuar tetë vdekje dhe dy të mbijetuar.” Raportet fillestare thanë se në bord kishte 22 persona.
Në videon, e publikuar në X, mund të shihni balonën me ajër të nxehtë që fillimisht merr flakë dhe më pas bie drejt tokës. Në tokë, disa njerëz filmojnë atë që po ndodh, nga flakët që ndizen deri te thyerja e shportës e cila, duke u shkëputur nga balona, merr shpejtësi dhe përplaset në mënyrë katastrofike.