Banorët e dy pallateve në Shkozet të Durrësit, të dëmtuar nga tërmeti i 26 nëntorit kundërshtuan vendimin e institutit të ndërtimit për riparimin e tyre.
Sipas akt-ekspertizës, njëri prej pallateve është klasifikuar me shkallën e dëmtimit DS4; kategori kjo që e përcakton shkallën e dëmeve të rëndë dhe që kërkon ekspertizë të thelluar.
Duke iu referuar këtij konstatimi, banorët thanë se rikthimi në banesa nuk jep garanci pasi pallati nuk do të jetë i qëndrueshëm.
Të njëjtën problematikë ngritën dhe banorët e pallatit ngjitur, sipas të cilëve, instituti i ndërtimit nuk ka bërë ekspertizë të plotë.
Ndërkohë nga ana tjetër, autoritetet bashkiake thanë për vizion plus se për shembjen apo riparimin e godinave të dëmtuara vendos vetëm instituti i ndërtimit dhe se do të respektohet vendimi i këtij të fundit.
Në qarkun e Durrësit janë dërguar për inspektim 1090 godina, të cilat morën dëme të shumta nga tërmeti tragjik i 26 nëntorit.