Njerëzit që jetojnë brenda zonës së deeskalimit të formuar në dhe rreth provincës së Idlibit në Siri i kanë dhënë mirëseardhje të ngrohtë trupave ushtarake turke të vendosura në këtë zonë për të mbështetur armëpushimin, shkruajnë mediet e huaja.
Përderisa trupat turke u vendosën në zonë, banorët e qarkut Daret Izze, zonë e deeskalimit e krijuar në rajonin rural perëndimor të Halepit, brohoritën për Turqinë dhe Presidentin turk Recep Tayyip Erdoğan.
Duke valëvitur flamuj të asocuar me Ushtrinë e Lirë Siriane (ULS), banorët e vendit brohorisnin slogane, si “Siria dhe Turqia janë miq” dhe “Të gjithë e duam Erdoğanin”.
“Jemi të lumtur që shohim vendosjen e vëllezërve tanë këtu. Ata janë të mirëpritur”, tha një banor vendas për AA. “Erdogan përfaqëson njerëzimin. Mallkuar qoftë PKK”, tha ai.
Shumë banorë vendas u mblodhën pas namazit të xhumasë për të shprehur mbështetjen e tyre për trupat turke.
“Faleminderit për mbrojtjen e popullit sirian. Mirë se vini në vendin tuaj, bij të Mehmetit, Çliruesit”, thanë ata.
Në përputhje me marrëveshjet e arritura gjatë bisedimeve të mëparshme të paqes në Astana, trupat turke kanë për detyrë të mbikëqyrin armëpushimin dhe të krijojnë një sërë pikash vëzhgimi përgjatë vijës Idlib-Afrin.
Ndryshe, autokolonat ushtarake turke hynë në veri të Idlibit pasi u dërguan nga qarku Reyhanli në provincën juglindore Hatay të Turqisë.
Trupat turke u vendosën fillimisht pranë Afrinit, i cili ndodhet pranë kufirit turk dhe që momentalisht mbahet nën kontroll nga organizata terroriste PKK/PYD.
Vendosjet e trupave turke janë duke u zhvilluar në përputhje me marrëveshjet e mëparshme të arritura në Astana nga tre shtetet garantuese, Turqia, Rusia dhe Irani.
Gjatë vendosjes, e cila pritet të zgjerohet gradualisht në jug, trupat turke shpresojnë të krijojnë më shumë se dhjetë pika të vëzhgimit në Idlib.
Ndërsa ushtria turke është ngarkuar me krijimin e pikave të vëzhgimit në qendër të Idlibit, Rusia ka detyrën ta bëjë të njëjtën gjë në zonat përreth.