Kryedemokrati Lulzim Basha tha se grumbullimet e njerëzve këtë të shtunë për t’u furnizuar janë shumë të rrezikshme. Teksa publikoi në “Facebook” një foto që ilustron grumbujt e qytetarëve, Basha deklaroi se në këtë mënyrë po hidhet poshtë çdo sakrificë.
“Kjo nuk është aspak mirë! Kjo është shumë e rrezikshme! Natyrisht që njerëzit duhet të blejnë gjërat e domosdoshme, duhet të marrin shërbimet esenciale, ju duhet të kryejnë disa pagesa, por grumbullime si këto janë të rrezikshme. Kjo është mënyrë e sigurtë për të përhapur virusin. Të tilla grumbullime zhvlerësojnë çdo sakrificë të bërë deri tani. Ndaj duhet një analizë objektive, bazuar mbi praktikat më efektive deri tani: Si mund të organizohet dhe zbatohet izolimi dhe distancimi sa më i disiplinuar dhe nga ana tjetër njerëzit të mund të marrin shërbimet jetike POR duke shmangur çdo dalje të panevojshme, radhët e gjata dhe grumbullimet masive.”
Reagimin kreu i opozitës e mbyll me një thirrje për qytetarët që të qëndrojnë në shtëpi në mënyrë që të izolohet virusi dhe t’i rikthehemi sa më parë realitetit.
