Kreu i PD, Lulzim Basha ka shprehur ngushëllimet e tij për familjen e 8-vjeçarit Mateo Vasiu I cili u vra dje nga Klodian Çalamani.
Basha thekson se kjo ngjarje është një këmbanë alarmi për të gjitha strukturat e shtetit shqiptar. Sipas Bashës, duhet një vëmendje e shtuar ndaj çdo rasti, një strategji e re përballjeje përtej propagandës, që ngjarje të tilla të parandalohen pa qenë vonë.
“Jam thellësisht i tronditur për ngjarjen e tmerrshme kriminale që i mori jetën një 8 vjeçari në Fier. Si prind, ndaj sot dhimbjen me prindërit dhe familjarët e Mateos dhe lus Zotin t’ua lehtësojë dhimbjen!Ngushëllimet më të ndjera familjes dhe të afërmve!Dita e djeshme, e cila jo për herë të parë na përballi me ngjarje të rëndë kriminale, është një këmbanë alarmi për të gjitha strukturat e shtetit shqiptar, për policinë, drejtësinë, shëndetësinë e kujdesin social. Duhet një vëmendje e shtuar ndaj çdo rasti, një strategji e re përballjeje përtej propagandës, që ngjarje të tilla të parandalohen pa qenë vonë”, shkruan Basha.
