Bashkia e Beratit dhe e Manisas në Turqi do të bashkëpunojnë në fushat e kulturës dhe turizmit.
Kjo u theksua gjatë një vizite zyrtare që përfaqësuesit e bashkisë së Beratit zhvilluan në bashkinë e Manisas në Turqi, bashki e binjakëzuar me Beratin.
Vizita u organizua në datat 25 – 29 prill, me ftesë të kryebashkiakut të Manisës, Cengiz Ergün, me rastin e Festivalit ‘’Mesir Paste’’, i cili është një event tradicional i qytetit, i përfshirë në listën e Trashëgimisë Botërorë të UNESCO-s.
Delegacioni i Bashkisë së Beratit përbëhej nga nënkryetarja e bashkisë, Afize Skëndo, këshilltari pranë kabinetit të kryetarit, Kastriot Rrapaj dhe drejtori i Ndërmarrjes së Gjelbërimit, Ermal Dollani.
Gjatë vizitës, përfaqësuesit e bashkisë së Beratit zhvilluan takime me autoritetet lokale, kryebashkiakun e qytetit dhe administratën e bashkisë, me guvernatorin e Manisës dhe drejtues të institucioneve lokale, ku ndanë idetë mbi bashkëpunime dypalëshe në fushat e kulturës, turizmit, shkëmbimet e stafeve dhe projekteve të përbashkëta.
