Bashkimi Evropian (BE) është i vendosur të luajë një rol pozitiv në zgjidhjen e mosmarrëveshjeve në Qipro, njoftoi një zyrtar i lartë i BE-së.
Bashkimi Evropian “do të jetë shumë i përkushtuar” për të mbështetur bisedimet e Qipros nën drejtimin e OKB-së si vëzhgues, deklaroi para gazetarëve Presidenti i Këshillit Evropian Charles Michel pasi liderët e BE-së u takuan përmes një videokonference.
“Ne mendojmë me të vërtetë se mund të luajmë një rol pozitiv ose të frytshëm në mënyrë që të mbështesim të gjitha përpjekjet pozitive që të kemi një përparim më të madh në rajon”, theksoi Michel.
Ai tha se blloku dëshiron “më shumë stabilitet dhe më shumë parashikueshmëri në këtë rajon të rëndësishëm për ne”.
Sekretari i Përgjithshëm i OKB-së Antonio Guterres njoftoi të mërkurën se do të thërriste një takim jozyrtar mbi Qipron në prill, duke përfshirë dy palët e ishullit dhe tre vendet garantuese Turqinë, Greqinë dhe Britaninë.
Ishulli i Qipros është ndarë që nga viti 1974, kur një grusht shtet i Qipros Greke u pasua nga dhuna kundër turqve të ishullit dhe ndërhyrja e Ankarasë si një fuqi garantuese.
Mbi çështjen e ishullit janë bërë disa përpjekje për zgjidhje paqësore, përfshirë iniciativën e dështuar të vitit 2017 në Zvicër nën kujdesin e vendeve garantuese.
Republika Turke e Qipros Veriore (TRNC) u themelua në vitin 1983.
