Bashkimi Evropian ka ngrirë bashkëpunimin me policinë izraelite për shkak të shqetësimeve në lidhje me politikat e qeverisë së ardhshme të Izraelit, njoftuan mediat izraelite të mërkurën.

Në shtator, Izraeli dhe BE nënshkruan një projekt-marrëveshje për të përmirësuar shkëmbimin e inteligjencës.

Marrëveshja duhet të miratohet nga Parlamenti Evropian, raporton Anatolia.

“Unioni e ka informuar ambasadorin izraelit Haim Regev se do të ndalojë për momentin promovimin e projekt-marrëveshjes për bashkëpunimin e inteligjencës ndërmjet policisë izraelite dhe Agjencisë Evropiane të Policisë – Europol”, shkruan gazeta Haaretz, duke cituar burime të mirëinformuara.

Vendimi për pezullimin i është dorëzuar Regev të premten e kaluar, sipas gazetës.

Zyrtarët izraelitë i thanë Haaretz se vendimi ishte treguesi i parë evropian se një ndryshim në politikën izraelite në Bregun Perëndimor të pushtuar do të dëmtonte bashkëpunimin me BE-në.

Gazeta tha se marrëveshja e re pritet të përfshijë një klauzolë që ndalon Izraelin të përdorë çdo informacion që merr nga Evropa për territoret palestineze të pushtuara në 1967.

E drejta ndërkombëtare e konsideron Bregun Perëndimor dhe Jerusalemin Lindor si territore të pushtuara dhe të gjitha aktivitetet e ndërtimit të vendbanimeve hebraike atje janë të paligjshme.

Kryeministri izraelit Benjamin Netanyahu ka rënë dakord t’i ofrojë politikanit të ekstremit të djathtë Itamar Ben-Gvir postin e ministrit të sigurisë kombëtare në një qeveri të re, një veprim që ka ngjallur shqetësim rajonal dhe ndërkombëtar.