Presidenti i Republikës, Bajram Begaj, priti këtë të enjte ambasadoren e Delegacionit të Bashkimit Evropian në Shqipëri, Sofia Moreira de Sousa, e cila i dorëzoi progres-raportin e Komisionit Evropian për vendin tonë.
Gjatë takimit, kreu i Shtetit e cilësoi raportin e këtij viti si dëshmi të përparimit të Shqipërisë në procesin e integrimit evropian dhe një hap tjetër drejt anëtarësimit në BE. Begaj shprehu gjithashtu mirënjohjen për mbështetjen e vazhdueshme të Komisionit Evropian dhe politikat pro zgjerimit të Bashkimit Evropian në Ballkanin Perëndimor.
Presidenti rikonfirmoi angazhimin e Shqipërisë për përfundimin e negociatave të anëtarësimit deri në vitin 2027 dhe anëtarësimin në Bashkimin Evropian në vitin 2030.
Në këtë kuadër, Begaj theksoi se forcimi i sundimit të ligjit, lufta kundër korrupsionit dhe krimit të organizuar, si dhe garantimi i lirisë së medias, mbeten prioritete të vendit.
Kreu i Shtetit nënvizoi gjithashtu se respektimi i shtetit të së drejtës, funksionimi i institucioneve dhe dialogu demokratik janë kushte thelbësore për përmbushjen e objektivit strategjik të integrimit evropian.