Policia belge thotë se ka zbuluar dy plantacione me kanabis gjatë javëve të fundit.
Bimët narkotike janë zbuluar në Meise dhe Tienen, ndërsa janë arrestuar disa shqiptarë, emrat e të cilëve nuk janë publikuar nga shtypi belg.
Në një fermë në Meise u zbulua një plantacion kanabisi me 2 mijë bimë narkotike.
Aty autoritetet arrestuan një shqiptar, i cili u përpoq të shkatërronte stoqet e drogës kur mësoi se policia po shkonte aty.
Ndërkohë, më 31 Janar në Tienen ishte gjetur një tjetër plantacion me 2100 bimë kanabis si dhe 3.5 kg kanabis i korrur.
Gjatë atij aksioni të policisë, u arrestuan tre shqiptarë dhe një shtetas belg me origjinë shqiptare.
Mediat shkruajnë se të arrestuarit kanë mohuar përfshirjen në veprimtari kriminale.
Hetimet e autoriteteve belge janë duke vazhduar për të zbardhur këtë aktivitet të paligjshëm dhe rolin e të arrestuarve.
