Dhoma Kombëtare e Zejtarisë organizoi sot ceremoninë e dhënies së titujve “Mjeshtër” për 8 zejtarë të drurit, gurit, bukës dhe pastiçerisë në qytetin muze të Beratit.
Në këtë aktivitet ishte i pranishëm ministri i Turizmit dhe Mjedisit, Blendi Klosi, presidenti i Dhomës Kombëtare të Zejtarisë, Luan Bregasi, anëtarë të Shoqatës së Bukës dhe Pastiçerisë.
Ministri i Turizmit dhe Mjedisit, Blendi Klosi tha se “zejet janë identiteti dhe shprehja e shpirtit, kulturës së një populli për të cilat turistët interesohen kaq shumë.
Sipas tij, mbajtja e kësaj tradite është vlerë për turizmin shqiptar.
President i Dhomës Kombëtare të Zejtarisë, Luan Bregasi përmendi gjithë punën që po bën institucioni që ai drejton në kuadrin e kualifikimit për arsimin profesional.
“Tetë mjeshtra duart artë e mendje artë po nderojmë sot në Berat me titullin “Mjeshtër” duke promovuar vlerat më të mira të artizanëve shqiptarë”, – tha Bregasi.
Kryetari i Shoqatës së Bukës dhe Pastiçerisë, Gëzim Peshkopia foli për bashkëpunimin e ngushtë që ka Dhoma me Shoqatën dhe vazhdimin e aktiviteteve.
Në fund të ceremonisë u realizua dhe ceremonia e dhënies së titujve “Mjeshtër” në sektorin e prodhimit dhe përpunimit të bukës dhe pastiçerisë.
