Ish kryeministri, Sali Berisha nuk ka në plan që të bëjë asnjë hap pas, për të cilin shumë nga radhët e PD theksojnë se është e domosdoshme për bashkimin e opozitës.
Në konferencën e tij javore me gazetarët, Berisha thekson se i vetmi hap që ai ka në plan të bëjë është ai i ftesës për diskutim dhe gjetjen e një zgjidhjeje të përbashkët.
“Jo që nuk bëj një hap mbrapa, por bëj hapa para për t’i ftuar që të ulen, të diskutojnë e të vendosin për më të mirën për PD, opozitën dhe të ardhmen e vendit”, tha Berisha.
Nga ana tjetër, Berisha ka vijuar akuzat ndaj qeverisë për blerje votash në zgjedhjet lokale të 14 majit, duke refuzuar edhe njëherë pranimin e rezultatit.
Këtë herë ai denoncoi shkeljet e pretenduara gjatë procesit zgjedhor në Elbasan.
“Jam këtu për t’u njoftuar ju, se zgjedhjet në Bashkinë e Elbasanit janë një nga farsat më të mëdha në historinë e zgjedhjeve.
Videot dëshmojnë se në mbi 70 përqind të qendrave të votimit, të ashtuquajturit operatorë, shkelën ligjin nga mëngjesi deri në darkë.
Ligji përcakton qëndrimin e tyre, distancën në të cilën ata qëndrojnë nga aparatura e votimit dhe këta militantë të PS-së, të përzgjedhur me kujdes, anëtarë të FRESSSH, të trajnuar në sipërmarrjen e peshkut të Lucës, dhe të trajtuar nga Luca, janë treguar shkelës të ligjit, kriminelë elektoralë pothuaj në të gjitha qendrat e votimit,” tha Berisha.
Ndërkohë, Kryesia e PD ka vendosur që më 29 korrik të zgjidhet kreu i ri i kësaj force politike.
