Lideri i opozitës, Sali Berisha, lajmëroi se raporti për parregullsitë e procesit zgjedhor të 14 majit ka përfunduar dhe javën e ardhshme do të bëhet publik.
Gjatë një konference për gazetarët, Berisha theksoi se demokratët kanë mbledhur të gjitha provat, të cilat sipas tij, tregojnë se vullneti i qytetarëve shqiptarë u manipulua.
SALI BERISHA
“Ky raport dëshmon se zgjedhjet e vitit 2023 ishin një proces totalisht i kontrolluar nga qeveria, një proces në të cilin shqiptarët votuan në një presion si kurrë më parë në 32 vite.”
Berisha shpjegoi qëndrimin e demokratëve në raport me reformën zgjedhore, duke nisur nga votimi i detyrueshëm, tek ndryshimi i sistemit.
“Jam i hapur plotësisht për proporcional të pastër, për lista të hapura. Proporcionali i pastër nuk mund të injorohet. Ka që tani disa inkonvenienca se rrezikon të pasurit dhe të fortët të fitojnë, por kjo është e drejtë.”
Gjatë bashkëbisedimit me gazetarët, Berisha pranoi se po e humbet betejën e tij në Paris kundër sekretarit amerikan të shtetit, i cili e shpalli “non grata”.
Lideri i opozitës ka sqaruar edhe foton me Alma Kaçin, duke pranuar se e ka takuar në zyrën e tij.
“Është e vërtetë që ka ardhur, nuk është e vërtetë kurrë se nuk është praktika ime e luftës politike kjo, se Erion Veliaj nuk do ishte kurrë ky që është në detyrë, po unë jam Sali Berisha dhe nuk shkoj në këto veprime. Këtë e di edhe Erion Veliaj vetë.”
Ish-Kryetari i Bashkisë së Kukësit, Safet Gjici, u shkarkua nga detyra pak ditë më parë, pas publikimit të një videoje dhe aktualisht ndodhet në burg me akuzat për korrupsion dhe shpërdorim detyre.
