Berisha njoftoi protestë për të nxjerrë Bashën nga selia, vjen reagimi i tij: Dyert tona janë të mbyllura për trafikantët e drogës që e shoqërojnë

kta.png

Ndajeni këtë artikull me të tjerë duke klikuar ikonat më poshtë

Ish kryeministri Sali Berisha njoftoi një protestë kombëtare në datën 8 janar me qëllim për të nxjerrë jashtë selisë kryetarin e PD, Lulzim Bashën i cili sipas ish kryeministrit e ka kthyer selinë blu një një bunker.

Në fundin e muajit dhjetor, Berisha vendosi një ultimatum ndaj Bashës duke i dhënë këtij të fundit kohë deri në datën 5 janar për të mbledhur sendet e tij dhe për të dalë nga selia e PD. Ndërsa menjëherë pas publikimit të njoftimit për protestën e 8 janarit, ka ardhur edhe reagimi zyrtar nga PD.

Me anë të një statusi në rrjetin social Facebook, grupi i Bashës ka deklaruar se dyert e selisë do jenë të mbyllura për personat që e shoqërojnë ish kryeministrin Berisha të cilët sipas deklarimeve të bëra nga Basha, janë persona me të shkuar kriminale.

Reagim i Partisë Demokratike të Shqipërisë

Partia Demokratike nuk do të jetë kurrë e hapur për trafikantët e drogës që shoqërojnë Sali Berishën në sulmin që po përgatit kundër Partisë Demokratike për të vendosur hallin e tij mbi të ardhmen e gjithë demokratëve. Çdokush e ka të qartë se gjuha dhe aktet e tij kanë qëllim të nxisin dhunë, si opsionin e vetëm që i ka mbetur. Sali Berisha mund të shoqërohet me trafikant droge të shpallur non-grata në Mbretërinë e Bashkuar, pjesë e organizatës kriminale B9. Mund t’i ftojë në shtëpi, familjarët e tij mund të bëjnë edhe biznes me pasuri të paluajtshme me ta në një skemë të pastër pastrimi parash, si dhe mund të ndajnë edhe fitimet nga bizneset me lojrat e fatit, por kurrë nuk kanë për t’u lejuar më të bëjnë biznes me sakrificën e demokratëve. Kurrë më!

Shumica dërrmuese e anëtarëve të Kryesisë së Partisë, Këshillit Kombëtar dhe 5004 delegatë të Kuvendit Kombëtar, më 18 Dhjetor zgjodhën të ardhmen, zgjodhën t’i shërbejnë interesit të demokratëve, zgjodhën t’i shërbejnë vetëm interesit të Shqipërisë. Ne jemi krenarë që jemi partia e parë politike në Shqipëri dhe Rajon që i bashkohet nismës botërore të SHBA për të mbajtur jashtë vendimmarrjes në institucionet e partisë personat e shpallur non-grata për korrupsion, abuzim me pushtetin apo përfshirje në krimin e organizuar.

Kasafortizimi dhe bunkerizimi nuk janë metoda të Partisë Demokratike, por të celulave ilegale që të vetmin merak kanë karriket dhe zyrat e tyre. Punimet dhe mirëmbajtja në seli këtë fillimviti bëhen në funksion të riorganizimit dhe rifreskimit të strukturave qendrore të partisë. Selia qendrore e Partisë Demokratike ka qenë dhe do të jetë gjithmonë e hapur për demokratët e sakrificave dhe kontributeve, por e mbyllur për ata që e kanë mbajtur peng Partinë Demokratike gjatë gjithë këtyre viteve me shpresën se mund ta përdorin për t’u fshehur, mbrojtur apo rregulluar punët e tyre të pista.

/faxweb

Ndajeni këtë artikull me të tjerë duke klikuar ikonat më poshtë