Kryetari i Partisë Demokratike, Sali Berisha, paralajmëroi nisjen e protestave kundër qeverisë Rama.
Gjatë një konference me gazetarët, Berisha listoi çështjen e ish-zyrtarit të FBI Mcgonigal si një prej arsyeve pse opozita ka zgjedhur tubimet si shtyllën kryesore të aksionit të saj politik.
SALI BERISHA
KRYETAR I PD
“Tani kalohet në fazën përfundimtare, në protestën e qëndrueshme deri në rrëzimin e Ramës.”
Berisha nuk dha një datë për nisjen e protestave, pasi më parë do të mblidhen forumet. Por sipas tij, shqiptarët nuk do të tolerojnë një kryeministër që ka përdorur ish-zyrtarin e lartë të FBI kundër opozitës.
“Edi Rama rekruton në korrupsion McGonigal për ti futur thikën opozitës, për të çimentosur pushtetin korruptiv të Edi Ramës. Edi Rama ka shndërruar Tiranën, zyrën e tij, në çerdhe, në një kënetë të vërtetë korruptive.”
Por Berisha akuzoi qeverinë se ka korruptuar edhe ambasadoret e akredituar në Tiranë, duke deklaruar se ambasadorja amerikane Yuri Kim ka gënjyer qeverinë amerikane për shpalljen e tij “non grata”.
“Kam arritur të faktoj se është edhe Yuri Kim, e cila ka gënjyer në mënyrë të padenjë qeverinë e vet. Yuri Kim ka nxjerrë së fundmi edhe FBI-në, çka nuk e ka thënë zëdhënësi i Departamentit të Shtetit, dhe unë deklaratat e DASH i besoj.”
Kryetari i PD, Berisha, është shfaqur indiferent ndaj vendimit për ta përjashtuar 10 ditë nga parlamenti.
“Parlamenti i Lindës dhe i Ramës është Parlamenti i turpit. Të enjten unë do të jem duke përgatitur protestën.”
Parlamenti ka përjashtuar sot për 10 ditë kryetarin e PD, Sali Berisha, dhe deputetët Belind Këlliçi, Edi Paloka, Flamur Noka dhe Edmond Spaho, për shkak të bllokimit të seancës plenare të së enjtes.