Kryetari i Partisë Demokratike Sali Berisha nderoi sot së bashku me të rinjtë e Partisë Demokratike 8 dhjetorin e vitit 1990 dhe rrëzimin e diktaturës komuniste.
Për herë të parë Berisha u shfaq në publik me syze për të mbuluar shenjat e incidentit dy ditë më parë; një incident që sipas kryetarit të Partisë Demokratike u organizua nga kryeministri Edi Rama.
SALI BERISHA
KRYETAR I PD
“Edi Rama, ky frikacak, nxjerr një kriminel në rrugë dhe gjuan. Një njeri mund të gjuhet, mund të vritet, por kauza nuk vdes kurrë.”
Kryetari i PD ashpërsoi tonet duke e cilësuar shefin e qeverisë Rama si pushtetues të vendit.
“Fillon faza e dytë e revolucionit, përballja me këtë armik, me këtë pushtues që ushtron gjenocid mbi Shqipërinë dhe shqiptarët. Koha në fton: aksion, aksion dhe vetëm aksion.”
Berisha u bëri apel të rinjve të ngrihen kundër qeverisë duke risjellë në vëmendje se në 8 dhjetorin e vitit 1990 ishin studentët ata që rrëzuan diktaturën komuniste.
“Mos harroni se jeni trashëgimtarë të një lëvizje, e cila me një guxim epik, me një guxim në kufijtë e legjendës, u përball në vitet ’90 me diktaturën më të egër staliniste, më çnjerëzore, më barbare, me diktaturën komuniste, e cila në kohën kur bashkëmoshatarët tuaj mbushën sheshin, diktatura vriste ata që niseshin për të arritur në botën e lirë, por mbeteshin nën breshëritë e kallashnikovëve të rojeve të vdekjes. Megjithatë ata të rinj, të udhëhequr nga bashkëmoshatari juaj Azem Hajdari, i shndërruar në një lider legjendar, e gjunjëzuan diktaturën dhe diktatorin.”
8 dhjetori është shpallur feste kombëtare për shkak se 22 vite më parë në Qytetin Studenti nisi lëvizja që rrezoi regjimin komunist në Shqipëri. Ikja e dritave për shkak të një defekti në kabinën elektrike shërbeu si katalizator për shpërthimin e revoltës së studentëve kundër diktaturës.
Në 8 dhjetor dhjetëra të rinj dolën nga godinat dhe protesta nisi në ambientet e Qytetit Studenti fillimisht me kërkesa ekonomike dhe një prej figurave qe spikati ishte Azem Hajdari. Revolta e studentëve vazhdoi deri sa në 11 dhjetor në mbrëmje, në takimin e zhvilluar në Pallatin e Brigadave mes studenteve dhe Ramiz Alisë, ky i fundit pranoi vendosjen e pluralizmit politik në Shqipëri.
