Besimtarët e krishterë festojnë Pashkët këtë të diel. Duke u nisur nga kjo festë, kryedemokrati Lulzim Basha ka vendosur të urojë të gjithë besimtarët me anë të një postimi në “Facebook”. Një lutje të veçantë ai ka për ata që sot përballen me COVID-19.
“Të dashur motra dhe vëllezër që kremtoni këtë ditë të shenjtë të Pashkës dhe Ringjalljes së Jezu Krishtit, unë dhe familja ime ju urojmë nga zemra, për shumë vjet Pashkët! Një urim dhe lutje të veçantë kam sot për ata që po përballen me sëmundjen, për personelin shëndetësor, për punonjësit e policisë, të forcave të armatosura, për klerikët dhe shërbëtorët e Zotit, për prindërit dhe vogëlushët në familjet në nevojë, për të moshuarit, për të sëmurët e më të pamundurit. Në këto kohë të vështira, drita e shpresës dhe kurajos ndeztë në zemrat dhe mendjet e çdo familje shqiptare besimin se ditë më të mira na presin. Zoti ju bekoftë ju dhe familjet tuaja, Zoti e bekoftë Shqipërinë dhe shqiptarët kudo ku janë!”
Në një situatë aspak të zakontë, mesha u mbajt online për shkak të pandemisë, ndërsa besimtarët e ndoqën përmes televizorit dhe rrjeteve sociale.