Presidenti amerikan Joe Biden, tha sot, pas takimit me presidentin palestinez Mahmud Abbas në Betlehem në Bregun Perëndimor të pushtuar, se populli palestinez meriton “shtetin e tij, të pavarur, sovran, të qëndrueshëm dhe të lidhur”.
Ai tha në një konferencë të përbashkët shtypi me Abbasin se ai e mbështet një shtet të tillë, por se kushtet për rinovimin e negociatave të paqes midis Izraelit dhe palestinezëve nuk janë pjekur dhe se një shtet i tillë “mund të duket shumë i largët”.
“Dy shtete për dy popuj, që të dy kanë rrënjë të thella dhe të lashta në këtë vend, për të jetuar në paqe dhe siguri”, shpjegoi Biden, duke folur për zgjidhjen e konfliktit bazuar në modelin shtetëror në një kohë kur procesi i paqes ka ngecur për më shumë se një dekadë.
Ai njoftoi 316 milionë ndihma financiare për palestinezët gjatë vizitës, por nuk ka një rrugë të qartë të kthimit në tryezën e bisedimeve.
Udhëheqësi amerikan tha se megjithëse kushtet nuk janë pjekur, SHBA dhe administrata e tij nuk do të heqin dorë nga përpjekjet e tyre për të afruar palestinezët dhe izraelitët. Abbas deklaroi se ka ardhur koha, siç tha ai, për të “kthyer faqen e pushtimit izraelit të vendit tonë”, dhe se Izraeli nuk mund të vazhdojë të veprojë si një “shtet mbi ligjin”.
Vërejtjet e Bidenit ka të ngjarë të zhgënjejnë palestinezët të cilët presin që SHBA-ja të bëjë presion ndaj Izraelit për të rifilluar bisedimet e paqes, pasi shteti hebre ka vendosur marrëdhënie zyrtare me disa vende arabe vitet e fundit.
Biden tha se bota nuk mund të presë për një marrëveshje paqeje dhe se duhet të ndërmerren hapa për të përmirësuar jetën e popullit palestinez.
Presidenti amerikan mbërriti në Betlehem pas një qëndrimin në Jerusalemin Lindor, ku premtoi 100 milionë dollarë ndihmë financiare për spitalet e qytetit, të cilat ende kërkojnë miratimin nga Kongresi amerikan, së bashku me 201 milionë dollarë për Agjencinë e Ndihmës dhe Punës së OKB-së për Palestinën.
Vizita e Biden në Bregun Perëndimor u prit me dyshim dhe hidhërim mes palestinezëve, të cilët mendojnë se ai ka ndërmarrë pak hapa për të ringjallur bisedimet e paqes që kur paraardhësi i tij, Donald Trump, i mënjanoi ato dhe e mbështeti fuqishëm Izraelin.
Biden vizitoi Bregun Perëndimor si pjesë e turneut të parë presidencial në Lindjen e Mesme.
Ndalesa e parë e atij turi ishte Izraeli dhe sot presidenti amerikan po udhëton për herë të parë drejt Arabisë Saudite direkt me avion nga Tel Avivi.
