Kreu i Grupit Parlamentar të Partisë Socialiste, Bledi Çuçi ka dënuar ditën e sot bllokimin që disa deputetë të opozitës i bënë mbledhjes së Komisionit të Reformës Zgjedhore.
Përmes një deklarate Çuçi thotë se pyetja me kë të flasësh mori përgjigje të qartë. Në mesazhin e tij kreu i Grupit të PS nuk e fsheh acarimin me Enkelejd Alibeajn dhe grupimin e Bashës që sipas tij nuk erdhi në mbledhje edhe pse ata bënë ftesën.
Sipas tij nga njëra anë janë ata që bëjnë skena dhune dhe pengojnë deputetët, nga ana tjetër janë ata që edhe kur thërrasin vetë Komisionin e Reformës Zgjedhore nuk paraqiten në mbledhje.
“Pyetja “me kë të flasësh” mori përgjigje më qartë se kurrë sot. Me ata të revolucionit të karrigeve që përsërisin skenat e dhunës sa tek selia e tyre e sa në Kuvend nga njëra anë, apo me ata që edhe kur thërrasin vetë Komisionin e Reformës Zgjedhore nuk paraqiten në mbledhje? Të dyja palët e partisë së bërë copë e çikë përveçse zhyten më keq në krizën ku kanë rënë prej vulës së humbur dhe sikletit me drejtësinë e re, nuk e pengojnë dot as reformën zgjedhore dhe as jetën parlamentare. Gjithesesi shqiptarët janë gjithmonë e më të qarte ne pergjigjen e tyre per Shqiperine. Partia Socialiste!”, theksoi Çuçi.
