Për shkak të luftës në Ukrainë, Gjermania nuk ka ndërmend të heqë dorë nga armët bërthamore amerikane që ndodhen në vend.
Deutsche Welle vizitoi bazën e Bundeswehr-it ku pilotët ushtrohen prej dekadash në rast se duhet të lëshojnë bomba bërthamore.
Thomas Schneider, 56 vjeç, është një kolonel në Forcat Ajrore Gjermane dhe komandant i Krahut të 33-të Taktik. Rreth tij në zyrë janë modele aeroplanësh, kryesisht Tornado.
“Kam 25 vjet që fluturoj me Tornado”, tha Schneider për DË. “Është një aeroplan i bukur, i bukur”.
Por Tornado është gjithashtu një avion i vjetër. Sidomos për një detyrë që i është caktuar në ushtrinë gjermane. Konkretisht, Bundeswehr-i është i detyruar të ketë një avion që mund të armatoset me armë bërthamore amerikane në rast emergjence.
“Më thyhet zemra”, thotë Schneider për daljen në pension të avionit të tij të dashur. “Por tani ne po marrim avionë të gjeneratës së pestë. F-35 është një nga më të mirët që kemi në NATO. Ne jemi krenarë dhe mezi presim ta marrim atë këtu”.
“Ne e dimë se çfarë të bëjmë”
Gjermania investon miliarda euro në ushtri. Që nga agresioni rus kundër Ukrainës, askush në qeveri nuk po flet për Gjermaninë pa armë atomike – edhe pse Social Demokratët, të Gjelbrit dhe Liberalët në pushtet e kishin planifikuar këtë në një marrëveshje koalicioni kur ata formuan qeverinë vitin e kaluar.
Një sondazh thotë se edhe gjermanët – më parë shumë kritikë ndaj bombave atomike – sot janë në shumicë në favor të mbajtjes së bombave bërthamore amerikane të tipit B61 në bazën Bichel në Gjermaninë perëndimore.
“Ne e dimë se çfarë të bëjmë. Detyra jonë është parandalimi bërthamor brenda NATO-s. Ne e kemi praktikuar këtë për më shumë se dyzet vjet. Ne jemi gati”, thotë Schneider. Dhe ai shton se shpreson se nuk do t’i duhet kurrë të shkrepë një armë atomike.
Baza ajrore e Bichel-it aktualisht është duke u rikonstruktuar, pista është duke u rinovuar. Për avionët F-35 nevojiten hangarë të rinj.
Protestat e dobëta
Një gjë e tillë nuk i pëlqen aspak grupit të njerëzve që bënë kamp proteste para bazës. Në total, janë dymbëdhjetë aktivistë të paqes që bëjnë lule dhe simbole të tjera të paqes nga letra.
“Po, ne jemi pak,” thotë Johannes Eller, 32 vjeç, nga Fushata Ndërkombëtare për Shfuqizimin e Armëve Atomike. “Kjo është një nga arsyet pse u përfshiva. Mua më dukej se vetëm një numër i vogël njerëzish u interesuan për këtë temë, edhe pse është kaq e rëndësishme dhe kërcënuese”, thotë ai për DW.
Si sukses të lëvizjes së paqes, Eller e sheh faktin se pesë vjet më parë (7 korrik 2017) u nënshkrua traktati për ndalimin e armëve atomike. Ai u nënshkrua nga 122 vende – asnjëra prej tyre fuqi bërthamore – dhe u ratifikua nga 66 vende. Eller mbron që Gjermania të aderojë në traktat.
“Përderisa ka armë atomike, kjo do të thotë se ato do të përdoren në një moment”, thotë aktivisti. “Duhet t’i ndalojmë,” shton ai, ndërsa dy Tornado vrumbullojnë sipër.
Vendasit janë mësuar me të
Qyteti i Bichel-it, ku ndodhet baza, jeton nga prania e ushtrisë. Përpara një kioske të ushqimit të shpejtë me specialitete turke, ushtarët presin me durim për të blerë doner dhe patate të skuqura.
“Kjo do të thotë punë për njerëzit këtu, kështu që ne jemi të gjithë të lumtur,” thotë Werner Gevenih, 65 vjeç, një pensionist i cili gjithashtu pret në radhë. “Nuk na shqetësojnë armët atomike, kemi shumë vite që jetojmë me to. Nëse ka një luftë atomike, atëherë ne të gjithë kemi mbaruar gjithsesi, duke jetuar pranë bazës ose shumë larg saj.”
Ushtarët kanë mbledhur ushqimin dhe po vazhdojnë. Kalimisht ata thonë se nuk janë të interesuar për aktivistët para bazës. Për sa kohë që nuk bllokojnë hyrjen, le të demonstrojnë me kënaqësi.
