Përgjatë javëve të fundit qytetarët në Evropë kanë provuar temperatura ekstreme të të nxehtit. Në Portugali e Spanjë temperaturat kapën disa herë shifra prej 47 gradësh celcius, ndërsa në veri të kontinentit, shumë britanikë mbetën të shastisur kur në vendin e tyre temperatura shkoi 41 gradë celcius e disa segmente asfalti nisën të shkrijnë.
Por temperaturat në Europë nuk janë “hiçgjë” kur i krahason me këtë qytet të varfër, atje ku njerëzit janë të detyruar të punojnë veçse natën, pasi gjatë ditës mund të ndërrosh jetë prej të nxehtit.
Qyteti quhet Jacobabad dhe përgjatë korrikut temperatura mesatare ishte tek 41 gradët celcius. Shumë qytetarë të qytetit pakistanez ndërruan jetë këtë verë si pasojë e të nxehtit të jashtëzakonshëm. Shpesh temperatura në këtë qytet prej afro 300 mijë banorësh kap 51 gradët.
Një temperaturë seriozisht ekstreme dhe e rrezikshme për jetët e njerëzve, duke patur parasysh se në Luginën e Vdekjes në Kaliforni, një ndër vendet më të nxehta të planetit, temperatura arrin 56.7 gradë.
E të tilla temperatura në qytetin e Jacobabad-it, janë shembulli më i qartë sesa e rrezikshme është jeta nën të nxehtin përvëlues.
Në këto kushte, shumë banorë të qytetit vendosin që ta kthejnë përmbys jetën gjatë verës, duke bërë ditën natë dhe e anasjellta. Puna zhvillohet natën kur është më fresk, ndërsa plot të tjerë mbledhin rrobat e largohen fare nga qyteti për të jetuar në ndonjë qytezë apo fshat pranë.
Dehidrimi dhe vapa janë veçanërisht të vështira për gratë me fëmijë të vegjël, ndërsa nëpër rrugët e vendit ka plot njerëz që dalin për të shitur ujë.
Burimi: Mirror
