Dy nxënës në moshë të re dhe shoferi i autobusit të vrarë. Ky ishte bilanci tragjik i ngjarjes së rëndë, që ndodhi 10 ditë më parë në Gllogjan të Deçanit. Edhe pse kanë kaluar mëse 1 javë nga ngjarja, ende nuk ka të arrestuar.
Rtv Dukagjini intervistoi një prej familjarëve të shoferit që mbeti i vrarë në tragjedi. Familjarët e Gani Gjokajt kërkojnë të vihet drejtësia në vend dhe të dinë se përse ndodhi një krim i tillë.
“Familja, brengën kryesore e ka zbulimin e rastit. Nga kush erdhi? Pyetja që çdo ditë bëjmë ne familjarët, vëllezërit, nëna e baba, pse dhe nga kush erdhi vrasja? Ta dimë arsyen. Nëse do t’i kishim pasur dikujt borxh ka pasur alternative tjera. Kjo për momentin është brenga më e madhe”, deklaroi për RTV Dukagjinin, Fatmir Gjokaj, familjar i shoferit të vrarë.
Gjokaj shtoi se nuk është aspak i kënaqur me institucionet ligjzbatuese të Kosovës, pasi sipas tij këta të fundit nuk e kanë ende një të dyshuar.
“Kemi hyrë në ditën e 11-të dhe nuk ka asnjë pistë hetimi. Nuk e kemi asnjë informatë të vetme që tregon se është duke u bërë një pistë hetimi apo që ka të dyshuar. Shpresojmë se një ditë e vërteta do të dalë në dritë”, deklaroi Gjokaj.
Kryeministri i Kosovës, Albin Kurti, deklaroi se sasia e informacioneve për vrasjen e trefishtë është shtuar dhe se hetuesit më të mirë të vendit po merren me këtë çështje.
“Sasia e informacionit për vrasjen e trefishtë në Gllogjan të Deçanit është duke u shtuar, meqenëse hetuesit më të mirë tanë janë të përfshirë atje. Mirëpo kur të kenë diçka konkrete sa i përket të pandehurit ose të pandehurve që e kryen këtë vrasje të trefishtë mizore, ne natyrisht që do t’iu njoftojmë me kohë”, tha kryeministri.
Nga Prokuroria e Pejës kanë thënë se hetimet janë duke vazhduar dhe se në këtë moment nuk mund të japin informacione tjera.
