Dhjetë njerëz vdiqën gjatë fundjavës në disa ortekë nëpër Alpet austriake dhe zvicerane. Turistët nga Zelanda e Re, Kina dhe Gjermania ishin në mesin e të vdekurve në një numër vendpushimesh të ndryshme skijimi.
Autoritetet austriake kanë lëshuar një paralajmërim për ortek të nivelit të katërt – i dyti më i madhi pas reshjeve intensive të borës dhe erërave në zonë.
Pavarësisht paralajmërimeve, vendpushimet e skive në Austrinë perëndimore janë mbushur plot për shkak të pushimeve shkollore.
Policia austriake njoftoi pesë vdekje të dielën dhe gjeti trupat e një udhërrëfyesi skijimi në Sankt Anton am Arlberg dhe një burri 62-vjeçar që kishte qenë duke bërë ski rreth majës së Hohe Aifner.
Të shtunën, një 17-vjeçar nga Zelanda e Re, një kinez 32-vjeçar dhe një gjerman rreth të 50-tave, të cilët thuhet se po bënin ski jashtë pistes kur ranë ortekët, u gjetën gjithashtu të vdekur.
Në Zvicër, një grua 56-vjeçare dhe një burrë 52-vjeçar vdiqën gjithashtu për shkak të borës së paqëndrueshme në kantonin juglindor të Graubuenden të shtunën në mëngjes. Policia zvicerane tha se një anëtar i tretë i grupit të tyre arriti të shpëtonte i padëmtuar.
Ortekët janë të zakonshëm në të dy vendet. Sipas agjencisë austriake të lajmeve APA, vetëm të shtunën në rajonin e Tirolit janë raportuar 30 ortekë.
Niveli i paralajmërimit të nivelit katër të Austrisë do të thotë “ka të ngjarë ortekë shumë të mëdhenj” dhe këshillon skiatorët e papërvojë të qëndrojnë në pista të hapura skish, ndërsa skiatorët me përvojë të qëndrojnë larg terreneve shumë të pjerrëta.
