Drejtoresha e Përgjithshme e INSTAT-it, Elsa Dhuli deklaroi sot se në Shqipëri numërohen 2.4 milionë banorë.
Në konferencën e organizuar për të publikuar të dhënat e dala nga Censi 2023, Dhuli bëri të ditur se Censi i popullsisë dhe banesave është një fotografi e çastit që i referohet mesnatës së datës 17- 18 shtator 2023, të organizuar nga Instituti i Statistikave.
“Ky cens, vlerësoi në territorin shqiptar në datë 18 shtator 2023, 2 402 113 banorë, të cilët përbëjnë 755 950 familje, me madhësi mesatare 3.2 anëtarë për familje, të cilët jetojnë në 1 082 529 banesa të zakonshme”, deklaroi Dhuli.
99.4 % e banorëve deklaruan se kanë shtetësi shqiptare dhe 98.3 % se kanë lindur në Shqipëri. Shkalla e alfabetizmit llogaritet 97.7 % me rritje prej 15 % . Në Shqipëri 55.7 % e femrave u deklaruan me arsim të lartë. Dendësia e popullsisë llogaritet 83.6 banorë për kilometër katror.
Referuar statistikave, nga 2 402 113 banorë të regjistruar në vend, 1 101 718 banorë deklaruan se i përkasin besimit mysliman dhe 115 644 i përkasin besimit bektashi.
Të dhënat tregojnë se 201 530 persona i përkasin besimit të krishterë katolik dhe 173 645 persona i përkasin besimit ortodoks.
Në censin e vitit 2023, 91 % e popullsisë deklaruan etnicitet shqiptar, ndërsa 2.8 % deklaruan një lloj tjetër etniciteti dhe 0.6 % nuk preferuan të përgjigjeshin. Një përqindje e vogël e popullsisë, vetëm 0.05 % kanë deklaruar “asnjë“ për etnicitetin.
2 186 917 persona u deklaruan me etni shqiptare, me etni greke u deklaruan 23 485 persona, me etni nga Maqedonia e Veriut u deklaruan 2 218 persona, me etni malazeze u deklaruan 511 persona, me etni aromune u deklaruan 2 459 persona, me etni rome 9 813 persona, me etni egjiptiane u deklaruan 12 375 persona, me etni boshnjake 2 963 persona, me etni serbe 584 persona, me etni bullgare 7 057 persona me etni tjetër 3798. Grup i perzier etno-kulturor u deklaruan 770 persona.
Raporti gjinor i popullsisë rezulton 98.2 meshkuj për 100 femra.
Ajo e cilësoi një proces mjaft të rëndësishëm për shkak se ofron informacion thelbësor për matjen e objektivave për zhvillim të qëndrueshëm, për tu integruar përmes statistikave zyrtare si një domosdoshmëri dhe gjuhë e përbashkët për matjen e progresit të çdo vendi në familjen e madhe europiane.
Dhuli vuri në dukje se kryerja e Censit plotësoi një nga kushtet për hapjen e negociatave, rezultatet do të përdoren për të siguruar statistika të nevojshme, si pjesë e Sistemit Statistikor Evropian në të ardhmen.
Të dhënat, shtoi ajo, janë një e mirë publike, dhe iu ofrohen hartuesve të politikave, vendimmarrëseve, studiuesve, bizneseve, për ti përdorur për planifikimin zhvillimor, analizën e dukurive demografike, sociale, ekonomike dhe mjedisore, marrjen e vendimeve të rëndësishme dhe zbatimin e tyre në praktikë në dobi të shoqërisë sonë.
Cens 2023, është i 12-ti në harkun kohor prej 100 vite, të historisë së censeve në
Shqipëri dhe të hapjes së zyrës së parë të statistikave zyrtare. /ata/
