Nëna e Alexei Navalny-it, kundërshtari kryesor i presidentit rus Vladimir Putin, i cili vdiq në një burg në Arktik javën e kaluar, tha të enjten se zyrtarët po i bëjnë presion asaj që të varroste djalin e saj “fshehurazi”.
Lyudmila Navalny tha se hetuesit e lejuan atë të shihte trupin e djalit të saj vonë më 21 shkurt në qytetin arktik të Salehardit, shkruan Radio Evropa e Lirë.
Në një deklaratë video, ajo konfirmoi se kishte nënshkruar certifikatën e vdekjes, por se autoritetet ende po mbanin trupin e djalit të saj.
Lyudmila Navalny tha se ajo kaloi 24 orë në zyrën e Komitetit Hetues në Salehard dhe u dërgua në morgun e atij qyteti ku pa trupin e djalit të saj për herë të parë që kur u njoftua për vdekjen e tij më 16 shkurt.
Ajo theksoi se ishte sjellë në morg “fshehurazi” duke theksuar se autoritetet po shkelin ligjin duke mos i dorëzuar trupin e djalit të saj dhe “duke vendosur kushte se ku, kur dhe si duhet të varroset Aleksey”.
Në prani të saj, autoritetet “morën urdhra ose nga Kremlini ose nga zyra qendrore e Komitetit Hetues”, tha ajo.
“Ata duan që varrimi të bëhet fshehurazi pa ndonjë ceremoni lamtumire. Do të më sjellin në buzë të varrezave dhe do të më thonë: ‘Këtu prehet djali yt’. Unë nuk jam dakord me këtë,” shtoi ajo.
Ajo tha se donte që varrimi i djalit të saj të bëhej publik, në mënyrë që të gjithë mbështetësit e tij të mund t’i thonë lamtumirë.
“Po e bëj këtë video sepse filluan të më kërcënojnë, po më shikojnë në sy dhe më thonë se nëse nuk jam dakord me varrimin e fshehtë, do të bëjnë diçka të keqe me trupin e djalit tim… Unë nuk dua asnjë kusht, vetëm dua që gjithçka të jetë në përputhje me ligjin, kërkoj që të ma japin menjëherë trupin e djalit tim”, tha ajo.
Lyudmila Navalny është përpjekur të marrë trupin e djalit të saj që nga vdekja e tij në një burg të regjimit special, lloji më i rreptë i burgjeve në Rusi.
Zyrtarët e burgut thanë se 47-vjeçari vdiq pasi u rrëzua teksa dilte nga qelia çdo ditë.
Më 21 shkurt, Lyudmila Navalny ngriti një padi në një gjykatë ruse duke kërkuar lirimin e trupit të djalit të saj. Një seancë dëgjimore me dyer të mbyllura për këtë ankesë është caktuar për më 4 mars.
Më 20 shkurt, Lyudmila Navalny postoi një video në mediat sociale të marrë jashtë të ashtuquajturit burgu i Ujkut Polar, ku Navalny mbahej që nga dhjetori, duke iu lutur presidentit rus Vladimir Putin për ndihmën e tij, duke thënë se “zgjidhja e kësaj çështjeje varet vetëm nga ju.”
