Vdekja e Jeffrey Epstein në gusht të vitit 2019, brenda Qendrës Korrektuese Metropolitan në Nju Jork, mbetet një nga ngjarjet më të biseduara dhe të rrethuara me mister në historinë e drejtësisë amerikane. Pamjet e publikuara nga emisioni “60 Minuta”, ofrojnë një tablo rrëqethësee mbi orët e tij të fundit, ku gjendja kaotike e qelisë dhe provat materiale dëshmojnë për një degradim të kushteve njerëzore.
Midis imazheve të një dysheku në dysheme, çarçafëve portokalli të shpërndarë dhe litarit të improvizuar nga pëlhura, bie në sy një shënim i shkruar me dorë, i cili konsiderohet si dëshmia e tij e fundit.
Në këtë letër, Epstein nuk jep sqarime për akuzat e rënda të trafikimit seksual që rëndonin mbi të, por ankohet për trajtimin brenda burgut. “….më mbajti në një kabinë dushi të kyçur për 1 orë. Noeli më solli ushqim të djegur. Kishte insekte gjigante që më zvarriteshin mbi duar. Nuk ishte zbavitëse!” – shkruhej në shënimin e gjetur në qeli.
Këto radhë pasqyrojnë një zhgënjim të madh të Epstein me sjelljen e gardianëve dhe kushteve higjienike, duke plotësuar panoramën e një njeriu që po humbte kontrollin mbi realitetin.
Ndonëse mjeku ligjor i Nju Jorkut e klasifikoi zyrtarisht vdekjen si vetëvrasje me varje, parregullsitë në burg – përfshirë rojet që falsifikuan të dhënat dhe mungesën e mbikëqyrjes pavarësisht tentativave të mëparshme – kanë ushqyer dyshime të vazhdueshme.
Letra, së bashku me fotot e qelisë së rrethuar me shirit policie, mbetet një nga dokumentet e pakta që dokumenton gjendjen mendore të 66-vjeçarit përpara se ai t’i shpëtonte përballjes me drejtësinë, edhe pse shumë nga sekretet që janë publikuar së fundmi, e kanë tronditur elitën botërore. /tesheshi.com/
