Milani vazhdon të ëndërrojë rikthimin në Champions League, por për ta arritur këtë objektiv duhet patjetër një vend në katërshen e parë të Serie A.
E ardhmja e afërt e kuqezinjve lidhet ngushtë me këtë renditje. Arsyeja është e thjeshtë: mungesa për dy vite radhazi në Champions do të kishte një ndikim të madh financiar.
Edhe pse klubi ka bilanc të qëndrueshëm, të ardhurat nga ky kompeticion, të vlerësuara mes 60 dhe 70 milionë euro, janë thelbësore për të forcuar skuadrën.
Këto fonde do të shërbenin për afrime cilësore, si një sulmues i madh apo një mbrojtës titullar, por edhe për të rritur pagat dhe për të bindur lojtarë të nivelit të lartë, si Leon Goretzka apo Robert Lewandowski.
Por çështja nuk lidhet vetëm me afrimet. Edhe qëndrimi i lojtarëve aktualë është në pikëpyetje. Christian Pulisic, në kulmin e karrierës dhe ende pa rinovuar kontratën, mund të mos pranojë një tjetër sezon pa skenën më të madhe europiane. E njëjta dilemë vlen për Rafael Leao dhe Luka Modric, i cili në fund të karrierës do të dëshironte të vazhdonte të luante në kompeticionin që e ka fituar gjashtë herë.
Një Milan jashtë Champions-it do të ishte gjithashtu më i ekspozuar në merkato. Për të blerë, klubi mund të detyrohet të shesë, siç ndodhi verën e kaluar. Ndërkohë, një vend i pestë do të sillte pjesëmarrjen në Europa League, duke kërkuar një skuadër më të thellë për të përballuar dy ndeshje në javë. Pa harruar edhe një fakt domethënës: në pesë vitet e fundit, pothuajse asnjë ekip kampion në Europë nuk ka luajtur paralelisht në Europa League. Një sinjal i qartë se prioriteti mbetet Champions-i.
