Shtëpia e Bardhë u bëri thirrje të gjithë anëtarëve të Organizatës Botërore të Tregtisë (OBT) që të mbështesin heqjen dorë nga pronësia intelektuale për vaksinat kundër COVID-19.
“Ne kemi nevojë që çdo anëtar i OBT-së të përshpejtojë dhe të mbështesë heqjen dorë nga pronësia intelektuale, dhe çdo kompani duhet tani me ambiciozitet dhe urgjencë të zgjerojë prodhimin”, u tha gazetarëve zëdhënësja e Shtëpisë së Bardhë Karine Jean-Pierre, raportoi Reuters.
Një vit pasi Afrika e Jugut dhe India paraqitën një propozim për heqjen e përkohshme të të drejtave të pronësisë intelektuale ndaj vaksinave dhe terapive kundër COVID-19 në OBT, negociatat nuk kanë arritur të bëjnë ndonjë përparim.
Biden ndryshoi qëndrimin e Shteteve të Bashkuara
Më shumë se 100 vende që mbështesin përjashtimin thonë se kjo do të ndihmonte në shpëtimin e jetëve duke lejuar vendet në zhvillim të prodhojnë vaksina kundër COVID-19, por Bashkimi Evropian dhe disa vende, përfshirë Zvicrën, mbeten kundër.
Presidenti Joe Biden ndryshoi qëndrimin e tij të mëparshëm të SHBA-së dhe e mbështeti propozimin në maj, por asnjë përparim nuk është bërë deri më tani.
Ekspertët paralajmërojnë se virusi korona nuk do të jetë i mundur të mposhtet derisa shumica e popullsisë së botës të vaksinohet. Gjithashtu, vonesa masive dhe vaksinimi i shpejtë lë hapësirë për përhapjen e shtameve të reja të virusit, të cilat mund të zhbëjnë përpjekjet e mëparshme për të luftuar pandeminë.
OBT planifikon të arrijë një marrëveshje për një përgjigje globale ndaj pandemisë në konferencën e saj ministrore në Gjenevë nga 30 nëntori deri më 3 dhjetor.
