Ministri i Brendshëm, Bledi Çuçi, prit sot në një takim zv.presidentin e Komisionit Europian Margaritis Schinas, me të cilin diskutoi çështje të emigracionit të jashtëligjshëm dhe azilkërkuesve.
“Teksa dëgjova prej tij vlerësimin se Shqipëria mbetet një shembull i mirë në menaxhimin e flukseve migratore që vijnë prej vendeve të Afrikës apo Lindjes së Mesme drejt Europës, riafirmuam mbështetjen që KE do t’i japë vendit tonë në fushën e emigracionit dhe në mënyrë të veçantë për të adresuar problemin e trafikut të klandestinëve.”, shprehet ministri Çuçi.
Në vijim Ministri i Brendshëm ka diskutuar me diplomatin europian edhe për marrëveshjen e Shqipërisë me FRONTEX si një histori suksesi në menaxhimin e kufijve.
“Shqipëria është e angazhuar që politikat e saj në fushën e emigracionit dhe azilit t’i përafrojë në formë progresive me Bashkimin Europian. E sigurova zv.presidentin Schinas se veprimet dhe prioritetet tona e projektojnë Shqipërinë si një anëtar të ardhshëm të besueshëm të unionit”, shprehet ministri Çuçi.
