Institucionet e Bashkimit Evropian ranë dakord të krijojnë fondin prej gjashtë miliardë eurosh për të forcuar marrëdhëniet ekonomike me vendet e Ballkanit Perëndimor, raporton Anadolia.
Këshilli i BE-së njoftoi se u arrit një marrëveshje për krijimin e Fondit për Reforma dhe Rritje, i cili u negociua nga vendet anëtare dhe Parlamenti Evropian dhe që është elementi kryesor i Planit të Rritjes së Ballkanit Perëndimor.
Ky instrument është pjesë qendrore e Planit të Rritjes për Ballkanin Perëndimor, të cilin Komisioni Evropian e prezantoi në nëntor të vitit 2023, njoftuan nga Brukseli.
Instrumenti do të mbulojë periudhën nga viti 2024 deri në vitin 2027 dhe pritet t’u sigurojë partnerëve të BE-së në Ballkanin Perëndimor deri në dy miliardë euro grante dhe katër miliardë euro kredi.
Ai do të plotësojë Instrumentin ekzistues për Asistencën e Para-Aderimit (IPA III), por gjithashtu do të rrisë ndjeshëm ndihmën financiare për partnerët në rajon.
U tha se fondi do të mbështesë reformat e BE-së në vendet e Ballkanit Perëndimor dhe do të inkurajojë afrimin ekonomik të BE-së dhe rajonit.
Pas kësaj faze, fondi do të hyjë në fuqi pas miratimit zyrtar nga PE dhe shtetet anëtare.
Vitin e kaluar, Komisioni i BE-së përgatiti një plan të ri rritjeje për Ballkanin Perëndimor në mënyrë që të rrisë rritjen ekonomike dhe të përshpejtojë konvergjencën socio-ekonomike.
Instrumenti i Reformës dhe Rritjes për Ballkanin Perëndimor synon të fillojë reformat socio-ekonomike në Ballkanin Perëndimor, të promovojë rritjen ekonomike dhe të përafrohet me BE-në.
Plani synon të forcojë marrëdhëniet ekonomike të Bashkimit Evropian me Shqipërinë, Kosovën, Bosnjë dhe Hercegovinën, Serbinë, Maqedoninë e Veriut dhe Malin e Zi.
