Të kesh prediabet do të thotë që nivelet e glukozës (sheqerit) në gjak janë më të larta se normalja – por jo aq të larta sa për t’u diagnostikuar si diabet. Prediabeti mund të çojë në sëmundje të zemrës, goditje në tru dhe diabetin e tipit 2, forma më e zakonshme e diabetit. Prediabeti shpesh mund të rikthehet përsëri nëse nuk e mbani nën kontroll.
Çfarë është diabeti?
Me diabetin e tipit 2, trupi juaj nuk mund të përdorë siç duhet insulinën (një hormon që ndihmon glukozën të futet në qelizat e trupit). Ju mund të keni diabet të tipit 2 në çdo moshë, por mosha e tretë është më e rrezikuar, nëse jeni mbipeshë, apo keni një histori familjare të diabetit, nuk jeni fizikisht aktive ose jeni një grua me diabet gestacional.
Diabeti gestacional është një lloj diabeti që disa gra e marrin kur janë shtatzënë. Edhe nëse nivelet e sheqerit në gjak të një gruaje ulen pas lindjes së foshnjës, ajo është në rrezik më të lartë për t’u prekur nga diabeti i tipit 2 me kalimin e viteve.
Me diabet të tipit 1, trupi juaj nuk mund të prodhojë insulinë, kështu që ju duhet të merrni insulinë çdo ditë. Diabeti i tipit 1 është më pak i zakonshëm se i tipit 2; afërsisht 5-10% e njerëzve që kanë diabet kanë tip 1.
Kush është në rrezik për prediabetin dhe diabetin e tipit 2?
Nëse i keni këta faktorë rreziku, mund të jeni në rrezik më të lartë se të tjerët për prediabetin dhe diabetin e tipit 2.
- Ju jeni mbipeshë.
- Jeni mbi 45 vjeç
- Prindi ose vëllai juaj ka diabet të tipit 2
- Jeni aktiv fizikisht më pak se 3 herë në javë
- Jeni diagnostikuar me diabet gjatë shtatzënisë (diabet gestacional).
Diabeti ka pasoja të rënda
Miliona njerëz kanë prediabet, sheqeri i tyre në gjak është më i lartë se normalja, por jo aq i lartë sa të konsiderohet diabeti i tipit 2. Shumë njerëz me prediabet mund të zhvillojnë diabetin e tipit 2 brenda 5 viteve, gjë që i vë ata në rrezik të problemeve serioze shëndetësore, duke përfshirë:
- Atak ne zemer
- Goditja në tru
- Verbëri
- Dështimi i veshkave
- Humbje të gjymtyrëve
Nëse keni prediabet, ndryshoni stilin tuaj të jetesës sepse është një nga mënyrat më efektive për të parandaluar marrjen e diabetit të tipit 2. Të jeni aktiv, të eleminoni ushqimet e pashëndetshme nga dieta juaj dhe reduktimi i stresit nga jeta e përditshme janë disa nga mënyrat për të parandaluar Diabetin./ CDC.gov
Përktheu për Gazetën Shëndeti, Griselda Ozuni.