Ish-presidenti Bujar Nishani ka kritikuar ashpër vendimin e Lulzim Bashës për të përçarë Partinë Demokratike duke përjashtuar nga grupi parlamentar liderin historik, Sali Berishën.
Gjatë një reagimi në rrjetet sociale, Nishani e quan këtë vendim si: “dhunim i rëndë i parimeve më fondamentale të lirisë, drejtësisë dhe demokracisë”.
Nishani e etiketoi Bashën si “argat të Edi Ramës”, ndërsa i bëri thirrje të gjithë demokratëve që të mos dorëzohen përballë këtij provokimi të rëndë për të vendosur siç thotë ai demokracinë në këtë vend.
Kujtojmë që ditën e sotme Partia Demokratike ishte e ndarë në dy kampe, pjesa që e mbështesin Sali Berishën dhe pjesa tjetër pro vendimit të Bashës. Berisha paralajmëroi se do të ketë një lëvizje të re që do i sillte PD sipas tij legjitimitetin, statusshmërinë dhe sovranitetin.
Reagimi i plotë i Bujar Nishanit:
Lulzim Basha ka vepruar si një skuth !
Një njeri i katapultuar në krye të Partisë Demokratike, pa asnjë kontribut politik e partiak, pa asnjë sakrificë dhe eksperiencë në beteja politike, një përfitues i përhershëm pa kurrfarë meritash, vendos të përçajë në mënyrë fatale atë parti.
Lulzim Basha fyen, përçmon e injoron çdo institucion e rregull minimal në Partinë Demokratike, duke marrë një vendim ekstrem, të përjashtimit nga Partia Demokratike të themeluesit të saj pa asnjë diskutim në forumet e partisë, pa asnjë mbështetje në statutin dhe rregullat legale të partisë, pa asnjë procedurë vendimarrëse të Kryesisë, Këshillit Kombëtar apo Kuvendit të Partisë Demokratike !
Vendimet personale, në fshehtësi, në mungesë të diskutimit midis të zgjedhurve legjitim të demokratëve, jashtë forumeve të partisë, janë karakteristika të një skuthi politik.
Ky akt është dhunim i rëndë i parimeve më fondamentale të lirisë, drejtësisë dhe demokracisë !
Ky është Lulzim Basha që u katapultua politikisht me misionin e asgjesimit të Partisë Demokratike, asgjesimin e së djathtës në politikën shqiptare, asgjesimin e alternativës qeverisëse përballë së majtës, trashegimtare e stalinistëve shqiptarë filoserbe.
Ky është sot pengu dhe argati i Edi Ramës, në krye të Partisë Demokratike !
Demokratët, shqiptarët e ndershëm, njerëzit e lirë dhe patriotë duhet të mos dorëzohen përballë këtij provokimi të rëndë për asgjesimin e fondamenteve me bazike të demokracisë.
Cilido që beson tek vlerat, parimet dhe morali, duhet të luftojë çdo ditë për ringritjen e Partisë Demokratike, për rivendosjen e parimeve dhe garancive bazë të lirisë, të së drejtës dhe demokracisë në këtë vend.
Kushdo që hesht sot është bashkëfajtor në asgjesimin e asaj partie dhe vlerave të demokracisë në tërësi !
…
/faxweb
