Ministri i Drejtësisë, Ulsi Manja, ka deklaruar se një nga aktet e miratuara në mbledhjen e qeverisë është dëmshpërblimi për 54 subjekte, të cilat i përkasin shtresës së ish-të përndjekurve politikë.
Manja, gjatë deklaratës për mediat, u shpreh se qeveria do të vijojë të mbështesë ish-të përndjekurit politikë.
“Vendosëm për dëmshpërblimin e ish-të dënuarve nga sistemi komunist, kjo për 54 subjekte. Subjektet e vendimit tonë janë jo vetëm për ata që e kanë vuajtur vetë, por dhe familjarët e tyre.
Masa e dëmshpërblimit do të paguhet në këste. Kjo masë as nuk i zhbën e as nuk i kthen vuajtjet, por është masë e domosdoshme në aspektin ligjor dhe moral, pasi tregon mbështetjen e qeverisë për këtë kategori të shumëvuajtur. Është vendimi i 29-të që kemi kaluar gjatë qeverisjes tonë, do të ketë edhe vendime të tjera”, tha Manja.
