Pas një periudhe stanjacioni në muajt e parë të vitit, depozitat bankare në Shqipëri janë rikthyer në rritje gjatë muajit maj. Sipas të dhënave më të fundit të Bankës së Shqipërisë, kursimet në sistemin bankar arritën në rreth 1.62 trilionë lekë, ose rreth 15.6 miliardë euro, në fund të muajit maj.
Krahasuar me të njëjtën periudhë të një viti më parë, depozitat janë shtuar me rreth 130 miliardë lekë (afërsisht 1.2 miliardë euro), çka përbën një rritje prej 8.7% në baza vjetore.
Rritja më e madhe është regjistruar te depozitat në valutë të huaj, të cilat përbëjnë aktualisht rreth 53% të totalit të kursimeve në banka. Depozitat në euro dhe dollar janë rritur si për individët ashtu edhe për bizneset, duke reflektuar rritjen e remitancave dhe përfitimet nga kursi i këmbimit.
Ndërkohë, depozitat në lekë kanë shënuar një rritje më të moderuar, ndonëse normat e interesit të ofruara nga bankat për kursimet në monedhën vendase janë më të larta se ato për valutë.
Ekspertët vlerësojnë se stabiliteti financiar, rënia e inflacionit dhe besimi më i lartë në sistemin bankar kanë ndikuar pozitivisht në këtë rikthim të prirjes për kursim. Nga ana tjetër, interesat më të larta për depozitat në lekë kanë nxitur gjithashtu qytetarët të ruajnë kapitalin në formë kursimesh bankare.
