Deputeti Kostaq Papa, rikthehen në Kuvend projektligjin “Për Shpalljen si det historik të Gjirit të Sarandës, Butrintit, Borshit, Qeparoit, Palasës”.
Disa ditë pasi e kishte dorëzuar versionin e parë, statusi i draftit në Kuvend qëndronte “i tërhequr”. I pyetur nga TPZ.al, Papa tha se “ Do të riparaqitet ditën e enjte! E tërhoqa unë për përmirësime teknike. Projekti ishte në 4 variante. Unë kisha paraqitur variantin e parë për të testuar tradhtarët e parlamentit dhe ata vërtet i mbushën pantallonat”, tha Papa pa shpjeguar se cilët e kishin kundërshtuar.
“Të enjten do të jetë dorëzuar e do të hyjë në axhendë. Se herën e parë ata gabuan dhe e kapi para kohe media, gjë që ishte gabim. Mos t’ju haj meraku për veprimet ligjore e detyrën që do e bej unë 100% po shikoni të mbështetni mediatikisht qëndrimin tim kombëtar, që do të bëj në vazhdim e që mund të arrij deri në Votë Mosbesim ndaj qeverisë.
Ajo që po bënë qeveria është tradhti e hapët duke i falur det shqiptar Greqisë. Tradhtia e Ramës u barazua me tradhtinë e Berishës më 2009. Biles po ja kalon”.
“Projektligji, -sipas variantit të tërhequr, -synon të mbyllë spekulimet në lidhje me problemet që janë shfaqur nga kërkesa e shtetit fqinj për delimitimin e ujërave detare dhe shtrirjen 12 milje të kufirit detar në Detin Jon. Projektligji synon të mbyllë mundësinë për korrupsion me ujërat detare e detin territorial shqiptar nga nëpunës të shtetit shqiptar gjate tratativave për marrëveshje me vendet fqinje. Ky projektligj mbyll përfundimisht mundësinë e matjeve te gabuara e me shumë përthyerje në detin e Gjirit të Sarandës dhe çon vijën e ujërave tona në koordinatat e duhura e të përcaktuara nga institucionet ndërkombëtare”.
Historia
Deputeti, megjithëse e kishte shkruar nxitimthi dhe me gabime ortografike, ofronte edhe argumente historike. Sipas deputetit, “Jul Qezari ka shkelur gjithë këtë hapësirë detare, por dhe tokësore sepse ai vendosi prapavijën e tij në bregun lindor të Liqenit të Butrintit në afërsi të Sopikut në vendin qe sot quhet Hambarët e Jul Qezarit.
Hapësira detare e Gjirit të Sarandës, por dhe toka kontinentale përballë: Butrinti, Onhenzmi etj, është përshkuar nga emra të njohur të historisë së lashtë: perandorë, senatorë, konsuj e autorë të lashtë romak, me te lavdishmit e asaj epoke të largët.
Prej detit mbërritën në tokë Dyzetë Shenjtorët dhe u vendosën në shpatin e malit mbi qytet e nga mendohet se ka ardhur emri i sotëm i qytetit”.
Një ide të tillë, për ta shpallur Gjirin e Sarandës det historik e ka rekomanduar edhe Kolonel Myslim Pashaj, ambientalisti Sazan Guri dhe të tjerë. Ndoshta kjo është arsyeja që qeveria ia ka lënë në dorë iniciativën e këtij ligji të rëndësishëm një deputeti opozitës formale dhe jo ta bënte me ekspertët e vet. Deputeti Papa është i njohur për deklaratën epike se “Kur isha kaçurrel qerasja femrat me whiskey”. Ai erdhi nga lista e Partisë Demokratike dhe zëvendësoi në parlament ish kryeministrin Sali Berisha.
/TPZ.al/