Deputeti Ralf Gjoni ka sulmuar nga foltorja e Parlamentit ambasadorin e Britanisë së Madhe në vendin tonë, Duncan Norman.
Gjoni tha se ambasadori britanik tallet me qytetarët shqiptarë për kauzën e integrimit të Shqipërisë në Bashkimin Europian, kur sipas tij, vetë vendi i ambasadorit, Britania e Madhe, doli nga BE-ja.
“Kulmi i ironisë dhe kulmi i batutës dhe talljes me shqiptarët, e dini kush është? Ambsadori i Mbretërisë së Bashkuar!
Ambasadori britanik del lartë e poshtë, shoku i Lulit dhe i Monës, del lartë e poshtë dhe flet për nevojën e integrimit. Po a ka turp më të madh.
Vendi që doli nga Bashkimi Europian, përfaqësuesi i këtij vendi sot tallet me shqiptarët. Deri dje tallej me këtë Parlament sepse na konsideronte ilegjitim.
Ju garantoj që Berlini dhe Parisi vënë duart mbi kokë teksa shohin që ambasadori i Londrës mbështet kauzën e integrimit.
Ta gëzoni kauzën e integrimit që është thjesht një përrallë e bukur”, tha deputeti Ralf Gjoni.
Ai ndërkohë shtoi, se në të ardhmen do të ketë vrasje mafioze politike në Shqipëri si në Siçilinë e viteve ’70.
“Fija e dytë është kriminalizimi i politikës.
Është bërë shumë më keq sot, sepse influencojnë votimin këtu ne Kuvend dhe do të vazhdojnë që të ushtrojnë të njëjtën influencë në zgjedhjet e 25 prillit.
Nuk ka votë të lirë më 25 prill, është një dhuratë që opozita e bashkuar ja ka bërë Edi Ramës.
Kështu që bashkë do ti shërbejnë njëri- tjetrit për të siguruar vazhdimësinë pushtetit.
Mbajeni mend por Shqipëria do të mbizotërohet nga vrasje mafioze politike si në Siçilinë e viteve 70“, tha ai.