Kompania bioteknike Moderna e SHBA nuk do të kërkojë autorizim urgjent për vaksinën e saj të koronavirusit deri në zgjedhjet presidenciale të SHBA, tha drejtori i kompanisë Stephane Bancel për Financial Times.
Kjo është një goditje e shpresave të Presidentit aktual Donald Trump se ai do të ketë një vaksinë të gatshme para zgjedhjeve të 3 nëntorit, në mënyrë që fushata e tij të marrë hovin e dëshiruar.
“Më 25 nëntor, ne do të kemi informacion të mjaftueshëm për autorizim urgjent, të cilin mund t’ia dërgojmë Administratës së Ushqimit dhe Barnave (FDA) – nëse provat e sigurisë supozohet të jenë të mira, domethënë vaksina është e sigurt”, u tha Bancel gazetarëve.
Trump, mbështetja e të cilit ka rënë për shkak të menaxhimit të tij të krizës COVID-19, ka qenë vazhdimisht duke bërë të ditur se vaksina mund të jetë gati deri në zgjedhjet e 3 nëntorit.
Kjo shqetësoi ekspertët se administrata Trump mund të përpiqet të ndërhyjë në procesin e kontrollit të zhvillimit të vaksinave për arsye politike.
Trump përsëriti pretendimin e tij në lidhje me gatishmërinë e vaksinave para zgjedhjeve të martën në mbrëmje, gjatë një debati me kandidatin demokrat për president Joe Biden.
Vaksina Moderna është një nga 11 vaksinat eksperimentale kundër koronavirusit në provat e fundit.
Një tjetër vaksinë është duke u zhvilluar nga Pfizer, drejtori i të cilit Albert Bourla tha se kompania e tij mund të ketë një përgjigje të qartë deri në tetor nëse vaksina e tyre do të funksionojë para zgjedhjeve.
Shumica e ekspertëve janë skeptikë ndaj pretendimit, duke besuar se testet e vazhdueshme nuk do të kenë statistika të mjaftueshme për të provuar sigurinë dhe efikasitetin e ilaçit deri në atë moment.
Në një intervistë me Washington Post të martën, Bourla mohoi përpjekjen për t’i bërë lajka presidentit me deklaratën e tij në lidhje me vaksinën.
“Për mua, dita e zgjedhjeve është një ditë e zakonshme. Fundi i tetorit është një ditë e zakonshme. Kështu punojmë. Nëse mund ta paraqesim vaksinën më herët, ne do ta bëjmë atë,” tha ai.
