Kryeministri Edi Rama ka bërë një reagim të dytë lidhur me dhunën në të cilën u përfshi Kuvendi i Kosovës. Rama shkruan se nuk ka rëndësi se nga kush është iniciuar dhuna fizike, por dështimi i funksionimit të demokracisë.
Kreu i qeverisë shton se Kosova u përfshi në një shfaqje skandaloze dhe ka rënë shumë poshtë në sytë e botës.
Rama ka përsëritur thirrjen e tij ndaj opozitës së Kosovës për t’u tërhequr nga skenat e dhunës.
“Më “mbytën” miq nga Kosova pse e paskam mbrojt Albinin, se shishen e parë e paska gjujt Bislimi dhe paska qenë VV që e paska hap kapitullin e dhunës në Kuvendin e Kosovës kur ishte në opozitë! Nuk më duhet kush e ka gjujt shishen e parë, mbase keni të drejtë ju, mbase jo, por nëse demokracia parlamentare katandiset në kush gjujti i pari atëherë kemi një problem edhe me kuptimin e demokracisë, edhe me kuptimin e këtij momenti kyç për Kosovën, e cila nuk ia ka borxh askujt besoj shfaqjen skandaloze të ditës së sotme. Dhe si dikush që e di mirë se sa poshtë ka rënë Kosova në sytë e krejt botës demokratike për shkak të qasjes së gabuar të qeverisë së saj, unë vazhdoj mendoj se çka ndodhi sot është e turpshme dhe jam i bindur se justifikimi i asaj shëmtie nuk e ndihmon, po e dëmton ende më shumë reputacionin e Kosovës, prandaj thashë dhe e them prapë se uroj që opozita të distancohet nga një shëmti e tillë!”, shkruan Rama.
Debatet mes mazhorancës dhe opozitës për incizimet e publikuara, ku kryetarja e Grupit Parlamentar të Vetëvendosjes, Mimoza Kusari shfaqet duke biseduar me Milan Radoiçiqin, degarduan në dhunë fizike mes deputetëve të kuvendit.
