Fotoja e mësipërme është një disk bronzi afro 30 centimetra, e menduar të jetë harta më e vjetër e yjeve në botë.
Disku qiellor i Nebra-s u gjet në vitin 1999 afër qytetit të Nebras në Gjermani, nga një grup personazh që gjuanin për thesare. Këta të fundit e lokalizuan diskun dhe një sërë thesaresh të tjera përmes detektorëve metalikë. Disku, së bashku me disa shpata, sopata e të tjera objekte, mendohet se i përkasin Epokës së Bronzit.
Autoritetet gjermane e morën në dorë diskun qiellor të Nebras në vitin 2001, ndërsa objekti i lashtë kishte kaluar disa herë në duart e tregtarëve të paligjshëm.
Në bazë të analizave, studiuesit e datojnë diskun në vitet 1600 BC, thënë ndryshe, me një moshë afro 3600 vjeçare.
Disku tregon diellin, hënën, solsticet si dhe disa yje (konstelacione) dhe konsiderohet nga studiuesit si një ndër hartat më të vjetra në botë, që tregon mbi botëkuptimin e njerëzve të asaj kohe për qiejt.
Pavarësisht bukurisë, detajeve të saj dhe faktit se UNESCO e ka cilësuar si një ndër zbulimet më të rëndësishme të shekullit të XX, ka edhe studiues që mendojnë ndryshe.
Dy arkeologë publikuan vitin e kaluar një artikull, ku pretendojnë se disku i përket Epokës së Hekurit. Harta sipas tyre mund të jetë afro 1 mijë vite më e re nga datimi i bërë më para. Artikulli solli debate të forta në Gjermani mes studiuesve, ndërsa Muzeu gjerman ka hedhur poshtë pretendimet e dy arkeologëve, duke thënë se mbi objektin janë kryer dhjetëra analiza e studime.