Trupat amerikane pritet të tërhiqen nga Iraku në mënyrë që të promovojnë “sovranitetin e kombit”, sipas një dokumenti të Departamentit të Mbrojtjes së SHBA të botuar në mediat sociale.

Një vendim i tillë thuhet se është marrë pasi parlamenti i Irakut miratoi në një seancë të jashtëzakonshme një rezolutë ku kërkohej që trupat e huaja të largoheshin nga vendi.

Sipas raporteve të mediave, dokumenti thotë se trupat e koalicionit të udhëhequra nga SHBA do të marrin një seri masash të nevojshme për të garantuar sigurinë dhe efikasitetin e të gjithë procesit.

Vendimi i parlamentit irakian erdhi pasi forcat amerikane vranë gjeneralin e lartë iranian Qassem Soleimani në një sulm në Bagdad.

Iraku, thuhet në dokument, ka kufizuar lëvizjen e forcave ndërkombëtare, si pjesë e përgatitjeve për një mekanizëm për tërheqjen e trupave të huaja nga ai vend.

“Autoritetet irakiene kanë përgatitur një mekanizëm për tërheqjen e trupave amerikane nga ky vend. Funksionimi i një koalicioni ndërkombëtar do të jetë i kufizuar në një rol këshillues, shpërndarjen e armëve dhe trainimin e forcave irakiane”, thuhet aty.

Sidoqoftë, këto informacione u mohuan më pas nga Sekretari i Mbrojtjes i SHBA, Mark Esper.

“Ne nuk tërhiqemi nga Iraku, dhe as nuk kemi një plan të tillë,” tha Esper.

 

Subscribe kanalin tonë në Youtube për të mos humbur asnjë video të re