Një ditë pas theksimit të Putinit për Kosovën si një precedent për njohjen nga Rusia të territoreve renegate ukrainase, të ashtuquajturat Republika Popullore e Donetskut (DNR) dhe Republika Popullore e Luhanskut (LNR), media serbe ka reaguar jashtëzakonisht ashpër ndaj deklaratës së tij.
Siç mëson Blic, Vuçiç do të ketë një fjalim të premten ose të shtunën, në të cilin do të merret me shpjegimin e asaj çfarë tha presidenti rus për njohjen e DNR dhe LNR.
Nga ana tjetër, faqet e para të gazetave serbe të së enjtes, veçanërisht tabloidet e kontrolluara nga regjimi i Vuçiçit, tregojnë hapur tronditjen nga deklaratat e Putinit.
Informer ka titullin “Konflikti botëror mbi shpinën tonë: Putin po luan me Kosovën”.
Blic nga ana tjetër, sjell një titull në të cilën vihet në pikëpyetje besnikëria e serbëve ndaj Putinit: “A i jemi betuar ne si komb shumë presidentit rus? Putini i ka harruar serbët dhe Kosovën për shkak të luftës”.
Tabloidi Srpski Telegraf është shumë më i mprehtë: “Kështu janë vëllezërit rusë? Putini i goditi Serbisë pas shpine: shkëmbeu Kosovën me Donbasin”.
Kurir: “Interesi lakuriq: Putini mbron interesat në Donetsk dhe Lugansk me interesin e tij, pa marrë parasysh pozicionin e Serbisë në Kosovë”. Në vazhdim të titullit është interesant të theksohet mesazhi “shteti ynë duhet të udhëhiqet ekskluzivisht nga interesat e veta”.
Tabloidi Objektiv më i drejtpërdrejtë: “Thikë pas shpine: Putin e njeh Kosovën”.
Edhe njëherë: çfarë tha Putini që ka tërbuar serbët?
Në një takim mes tij dhe Sekretarit të Përgjithshëm të OKB-së, Antonio Guterres në Moskë, Putin u përpoq të shpjegojë kriteret e sakta me të cilat Rusia njeh pavarësinë e DNR dhe LNR. Këto janë rajone të shkëputura të Ukrainës, ku separatistët pro-rusë kanë shpallur pavarësinë, e cila aktualisht njihet vetëm nga Rusia.
Në takim, Putin iu referua, siç tha, precedentit të Kosovës.
“Republika Popullore e Donetskut dhe Republika Popullore e Luhanskut janë bërë të pavarura në analogji me vendimin e Gjykatës Ndërkombëtare të Drejtësisë për Kosovën”, tha Putin.