Nënkryetari i Kuvendit dhe njëherësh deputeti i PD, Agron Gjekmarkaj ka përshëndetur deklaratat e ambasadave të SHBA dhe Britanisë, të cilat bëjnë thirrje për dialog konstruktiv mes opozitës dhe mazhorancës.
Me anë të një reagimi, Gjekmarkaj thotë se një parlament që nuk respekton të drejtat e opozitës, humb funksionimin normal të tij, duke mohuar ushtrimin e përgjegjësisë për mbikëqyrjen demokratike të qeverisë.
Deputeti demokrat i bën thirrje kryeparlamentares Lindita Nikolla, por edhe mazhorancës që të reflektojnë dhe ti krijojnë opozitës mundësinë për të ushtruar e qetë të drejtat e saj kushtetuese në mbrojtje të interesit të qytetarëve.
“Përshëndes deklaratat konstruktive të partnerëve tanë strategjik SHBA-Britani e Madhe, për dialog konstruktiv mes opozitës dhe mazhorancës. Me përgjegjësinë ndaj interesit të qytetarëve prej më shumë se një muaj, opozita kërkon kthimin në normalitet të Parlamentit dhe funksionimin e plotë të tij, duke respektuar të drejtat kushtetuese të opozitës. Një parlament që nuk respekton të drejtat e opozitës, humb funksionimim normal të tij, duke mohuar ushtrimin e përgjegjësisë për mbikëqyrjen demokratike të qeverisë. Është e papranueshme për një vend demokratik që dialogu konstruktiv mes palëve të zëvendësohet me shndërrimin e sallës së parlamentit në repart gardist, për të shuar me forca sigurie zërin e opozitës për të drejtat e saj. Me besimin e plotë se funksionimi normal i Parlamentit kërkon mbi të gjitha respektimin e opozitës, i bëj thirrje Kryetares së Kuvendit dhe mazhorancës të reflektojnë dhe ti krijojnë opozitës mundësinë për të ushtruar e qetë të drejtat e saj kushtetuese në mbrojtje të interesit të qytetarëve. Ngritja e Komisioneve Hetimore dhe heqja dorë nga emërimi i opozitës, janë parakushte për një Shqipëri të denjë për të qenë anëtare e NATO-s dhe vend kandidat në BE”, thuhet ne reagimin e Agron Gjekmarkajt.
LEXO EDHE: “Jemi të shqetësuar”- Tensionet në Kuvend, reagon ambasada e SHBA: Kjo nuk është në interes të Shqipërisë, me rëndësi kritike që…
LEXO EDHE: Kaosi në Kuvend, Ambasada Britanike thirrje mazhorancës dhe opozitës: Punoni së bashku që Parlamenti të mund të ushtrojë rolin mbikëqyrës dhe të veprojë në interes të qytetarëve
