Shpesh herë kemi lexuar apo dëgjuar lajme për vështirësitë në frymëmarrje, që kalojnë ata që janë të prekur prej Covid.. por rrallëkush ka dëgjuar histori si ajo e kësaj 14 vjeçareje nga qyteti i Lushnjes.
Xhesilaida, jeton prej 13 vitesh me një gyp të ‘prangosur’ në fyt. Kjo është e vetmja mënyrë që ajo mund të marrë frymë. Dhe jeta për Xhesin, ka qenë një frymë që pritej nga dhimbja, pamundësia, humbja e gëzimit të të qenit fëmijë.
“Shqiptarët për Shqiptarët” e përcollën rastin e 14 vjeçares disa javë më parë. Xhesi kishte nevojë emergjente për të kryer një ndërhyrje, në mënyrë që gypi që ajo mbante në fyt të largohej përgjithnjë.
“Njerëzit më shikojnë rrugës, në orën e mësimit, më shikojnë, më paragjykojnë, unë qaja në shtëpi. Duroj nuk kam çfarë të bëj”, na tregonte Xhesi.
Dhe dita e lumturisë për 14 vjeçaren nuk vonoi. Falë qindra kontributeve të shqiptarëve, paratë e nevojshme për operimin e saj u mblodhën. Fatma Naçi udhëtoi drejt qytetit dhe u përlot teksa dëgjonte dëshirat e adoleshentes. Zëri i Xhesit fliste për ëndrra, ndërsa zhurma e gypit në fytin e saj i ‘thyente’ ato.
Fatma: Të kemi shumë xhan dhe jemi këtu për të të ndihmuar dhe për të të përkrahur ty. Xhesi çfarë ke dëshirë?
Xhesilaida: Unë dua të shërohem dhe të kem rroba të bukura.
Fatma i dha lajmin e bukur Xhesit, se paratë për ndërhyrjen e saj ishin mbledhur.
Fatma: Ne jemi këtu për të të thënë që të gjithë shqiptarët u mblodhën dhe e bënë të mundur shumë e parave për operacionin tënd.
Pas këtij lajmi të bukur, Xhesi u nis drejt Italisë ku dhe kreu ndërhyrjen delikate.
