Situatë shqetësuese në qarkullimin rrugor të Durrësit. Monitorimet intensive të Policisë Rrugore gjatë fundjavës, në kuadër të planit të masave “Fundjava”, kanë zbuluar një panoramë alarmante shkeljesh të rënda, që rrezikojnë drejtpërdrejt jetën e qytetarëve.
Brenda një fundjave, 6 shtetas janë arrestuar, pasi drejtonin automjetet në gjendje të dehur, pa leje drejtimi, dhe në disa raste kanë shkuar edhe më tej, duke tentuar të korruptojnë punonjësit e Policisë Rrugore për t’iu shmangur testit të alkoolit dhe arrestimit.
Gjatë kontrolleve në rrugët “Petrit Llaftiu” dhe “Taulantia”, Policia konstatoi dy automjete që kryenin manovra të rrezikshme. Drejtuesit e tyre, shtetasit N. N. dhe H. M., u ndaluan menjëherë.
Për të shmangur ndëshkimin, të dy kanë tentuar t’u ofrojnë shuma parash punonjësve të Policisë, duke rënduar më tej pozitën e tyre ligjore. Gjatë monitorimeve janë arrestuar gjithashtu:
-
D. M., e cila drejtonte automjetin me 1.22 mg/l alkool
-
D. Ç., me një nivel ekstrem prej 2.21 mg/l alkool, një shifër që konsiderohet rrezik serioz për jetën
-
R. D., i cili u kap duke drejtuar automjetin pa leje drejtimi, në rrugën “Hysen Kertusha”
Policia bën me dije se vetëm gjatë muajit janar, janë arrestuar edhe 4 drejtues të tjerë për drejtim mjeti në gjendje të dehur dhe tentativa korrupsioni, çka tregon se fenomeni është në rritje.
Të gjitha materialet procedurale i janë referuar Prokurorisë së Durrësit, për veprat penale:
Policia Rrugore e Durrësit apelon me forcë për respektimin e rregullave të qarkullimit, duke theksuar se:
-
drejtimi i mjetit në gjendje të dehur,
-
përdorimi i celularit gjatë drejtimit,
-
dhe shpërfillja e sinjalistikës rrugore janë faktorë kryesorë që po kthehen në kërcënim serioz për sigurinë publike.
