Në një superfalje masive jo në sheshin “Skënderbej” por te “Dëshmorët e Kombit”, besimtarët muslmanë të Tiranës e jo vetëm shpalosën besimin e tyre të pastër në Zotin një.
Në mesazhet e tij, kreu i KMSH-së Bujar Spahiu veçoi gëzimin e dyfishtë të kësaj dite.
“Si rrallëherë, sot bashkohet dita më e bukure e javës, e xhuma me ditën më të bukur të vitit, Kurban Bajramin, një gëzim i dyfishtë. Kurban Bajrami na rikujton sakrificën sublime të Profetit Ibrahim, paqja e zotit qoftë mbi të, i cili u përul me besim të plotë ndaj urdhrit të zotit dhe gjithësisë”, tha Spahiu.
Kjo ditë, tha Spahiu, duhet të shihet si një dritë shprese në një kohë kur po përballemi me sfida ekonomike, sociale dhe shpirtërore.
“Kjo sakrificë na mëson edhe ne sot se besimi nuk është vetëm fjalë por vepër. Jo vetëm ritual por angazhim i sinqertë për të qenë më të drejtë, të ndershëm dhe më të mëshirshëm në çdo hap të jetës tonë. Të nderuar vëllezër e motra, feja jonë islame na mëson se besimi nuk është i plotë pa ndjeshmëri sociale, nuk është i plotësuar adhurimi ynë nëse nuk përfshihet në të edhe përgjegjësia ndaj njëri-tjetrit. Edhe shoqëria jonë s’do të jetë e drejtë nëse në themelet e saj nuk qëndrojnë vlerat hyjnore, mëshira, drejtësia, bujaria dhe ndershmëria.
Sot Kurban Bajrami është një ftesë për të gjithë, pa dallim, për punëtorin dhe fermerin që me djersën e ballit mbajnë familjet, për nënat dhe gjyshet, për të rinjtë që kërkojnë vendin e tyre në shoqëri, për mësuesit që mbjellin dituri, për mjekët dhe drejtuesit që ndikojnë në zhvillimin e shoqërisë.
Në një kohë kur sfidat ekonomike, sociale e shpirtërore prekin shumë familje, Bajrami vjen si dritë shprese. Le të mos e shohim si ditë pushimi dhe konsumi por si ditë adhurimi, ashtu siç është vërtetë, si mundësi për të rindërtuar lidhjet tona me zotin dhe njëri-tjetrin”, tha Spahiu.
