SHBA ka sanksionuar së fundi dy emra nga Parlamenti serb, njëra grua. Fjala është për Verica Radeta dhe Petar Jojiç, për përfshirjen e tyre në “korrupsion të rëndësishëm”, njoftoi të premten zëdhënësi i Departamentit të Shtetit Ned Price.
Thuhet se si deputetë, Radeta dhe Jojiç korruptuan dhe frikësuan dëshmitarët që supozohej të paraqiteshin para Gjykatës Ndërkombëtare Penale për ish-Jugosllavinë (ICTY), me qëllim që t’i bindnin ata të hiqnin dorë nga paraqitja e provave inkriminuese kundër liderit të Partisë Radikale Serbe (SRS) dhe kriminelit të luftës, Vojisllav Sheshelj.
“Sjellja e tyre prishi proceset gjyqësore, për këtë arsye Gjykata e Hagës lëshoi një urdhër ndërkombëtar për ta për shpërfillje të gjykatës, duke rrezikuar stabilitetin rajonal dhe duke ndikuar negativisht në interesat kombëtare të SHBA-së”, thuhet në deklaratë.
Departamenti i Shtetit shton se vendimi për të vendosur sanksione “konfirmon vendosmërinë e SHBA-së për të luftuar korrupsionin, i cili dëmton interesat publike, pengon prosperitetin ekonomik të partnerëve dhe kufizon aftësinë e qeverive për t’iu përgjigjur në mënyrë efektive nevojave të qytetarëve të tyre”.
Siç u shtua, SHBA është ende me të gjithë qytetarët e Serbisë në mbështetje të demokracisë dhe sundimit të ligjit dhe do të vazhdojë të avokojë për përgjegjësinë e atyre që abuzojnë me pushtetin për përfitime personale.
Sanksionet vlejnë edhe për Gojko Jojiç, djalin e rritur të Petar Jojiç, njoftoi Departamenti i Shtetit.