Deputetja e Partisë Demokratike, Jorida Tabaku ka folur në Mbledhjen e Këshillit Kombëtar të Integrimit, por siç tha ai ky nuk është një takim zyrtar, por një takim konsultativ për planin e ri të rritjes.
Në fjalën e saj, Jorida Tabaku theksoi se plani i rritjes është një mundësi dhe një luks që të gjitha vendet e Ballkanit Perëndimor nuk duhet ta humbin.
Tabaku theksoi se “Plani i ri i rritjes vendos një theks të caktuar në rritjen e integrimit ekonomik, në tregun rajonal, në përshpejtimin e disa reformave që i kanë munguar vendeve të Ballkanit Perendimor”.
“Ky nuk është në takim zyrtar i këshillit të integrimit, dëshira ime për ta pasur parlamentin funksional nuk ndryshon. Shpresoj që në ditët në vijim të fillojmë me punët e parlamentit. Ky është një takim konsultativ, duke pasur parasysh faktin për të mirëpritur parlamentin e Shqipërisë miq që vijnë nga rajoni për të diskutuar për planin e ri të rritjes.
Dua të ndalem në dy elemente kryesore; Së pari është një luks të cilin nuk duhet ta humbim, plani i ri i rritjes dhe fondet për të financuar reforma, të cilat fatkeqësisht nuk kanë ndodhur deri tani. Plani i ri i rritjes vendos një theks të caktuar në rritjen e integrimit ekonomik, në tregun rajonal, në përshpejtimin e disa reformave që i kanë munguar vendeve të BP. Kjo shoqërohet më një rritje të asistencës financiare.
Plani i rritjes prej 6 mld eurosh, është një mundësi e cila unë shpresoj që qeveritë e vendeve të BP ta materializojnë duke ndërtuar edhe planet e reformave ekonomike”, tha Tabaku.
Po ashtu deputetja demokrate u ndal edhe tek roli i parlamentit, që sipas saj duhet të jetë i ndarë nga roli i qeverisë në procesin e integrimit.
“Unë dua të ndalem edhe tek roli i parlamentit, për rolin që ka në procesin e integrimit. Monitorimi në procesin e integrimit të institucioneve të pavarura, si ato kryejnë detyrimet e procesit të integrimit, detyrimet që lindin nga raportet e vendeve të progresit, por edhe pas publikimit të raportit të screening duhet të jenë komunikim i hershëm dhe vazhdueshëm mes qeverisë dhe parlamentit. Ligji i ri i ka dhënë më shumë funksione parlamentit, funksione që nuk i kryen dot qeveria”, duke vendosur theksin edhe tek roli i shoqërisë civile.
Sipas Jorida Tabakut është e pafalshme që në Parlamentin shqiptar të votohen ligje që janë ta atakueshme apo që nuk kanë gjithëpërfshirjen e shoqërisë civile.
“Është e pafalshme që në parlament kalojnë ligji të atakueshme, është e pafalshme që në këtë proces ku jemi të miratohen ligji që nuk kanë gjithëpërfshirjen e shoqërisë civile. Është e pafalshme që në një moment ku duhet ta bëjmë procesi i integrimit prioritet të fokusohemi në interesa të tjera që shkojnë në të kundërt të procesit të integrimit”.