Sistemi i eksportit të gazit të Norvegjisë duhet të dërgojë sasi rekord energjie në Evropë këtë vit, pas një ndërprerjeje të mirëmbajtjes në shtator, tha kreu i operatorit të sistemit të gazsjellësit Gasco.
Norvegjia është bërë furnizuesi më i madh i gazit në Evropë këtë vit, duke kapërcyer Rusinë edhe para mbylljes së javës së kaluar të gazsjellësit Nord Stream 1, sipas të dhënave nga Refinitiv Eikon.
Sistemi i tubacioneve të Gassco-s furnizon Mbretërinë e Bashkuar, Gjermaninë, Belgjikën dhe Francën, tha Reuters, duke shtuar se kompania kishte vonuar mirëmbajtjen e verës këtë vit për të siguruar furnizime pas furnizimeve të reduktuara nga Rusia.
Sasi rekord të gazit norvegjez
“Këtë verë kemi dorëzuar (sasinë e gazit) që normalisht do ta dorëzonim në muajt e dimrit,” tha CEO i Gassco, Frode Leversund.
Në vitin 2022, Norvegjia do të dërgojë më shumë se 117 miliardë metra kub gaz përmes tubacioneve të gazit, që është një rekord i ri vjetor, krahasuar me 113.2 miliardë metra kub të vitit të kaluar, shtoi Leversund.
Sipas tij, kapaciteti i përgjithshëm i Gassco-s mund të rritet edhe nga tubacioni i ri i gazit Baltic Pipe, i cili do të lidhë Norvegjinë me Poloninë nëpërmjet Danimarkës dhe duhet të fillojë funksionimin në tetor.
Efekti i saktë i shtimit të tubit do të dihet vetëm kur gazsjellësi të fillojë të funksionojë, vuri në dukje kreu i kompanisë norvegjeze.
Sipas parashikimeve zyrtare nga maji, prodhimi total norvegjez, duke përfshirë gazin natyror të lëngshëm, mund të rritet me tetë për qind këtë vit, në 122 miliardë metra kub.