Tre zyrtarë të Katarit humbën jetën dhe dy të tjerë u plagosën në një aksident me makinë pranë vendpushimit egjiptian të Detit të Kuq, Sharm el-Sheikh, tha të dielën ambasada e Katarit në Kajro.
Burime të sigurisë egjiptiane thanë se aksidenti ndodhi ndërsa anëtarët e delegacionit të Katarit po udhëtonin nga rezidenca e tyre për në një takim zyrtar. Automjeti që i transportonte ata u përplas me një makinë tjetër në njërën nga rrugët kryesore që të çon në Qendrën Ndërkombëtare të Konferencave Sharm el-Sheikh.
Të plagosurit u dërguan menjëherë në Spitalin Ndërkombëtar të Sharm el-Sheikh për trajtim mjekësor, ndërsa autoritetet egjiptiane nisën një hetim për të përcaktuar rrethanat dhe shkaqet e aksidentit.
Burimet thanë gjithashtu se delegacioni i Katarit po merrte pjesë në përpjekjet e vazhdueshme diplomatike për të diskutuar zhvillimet e fundit në bisedimet e sponsorizuara nga Kajro, të cilat përfshijnë delegacione nga disa vende rajonale dhe të huaja.